"Челси" собиқ футболчиси юрак муаммолари сабабли фаолиятини якунлаши мумкин

"Челси" ва Бразилия терма жамоасининг собиқ аъзоси Оскар юрак билан боғлиқ муаммолар туфайли "Сан-Паулу"даги шифохоналардан бирига ётқизилди. Бу ҳақда клуб матбуот хизмати хабар берди.

Ҳодиса сешанба, 11 ноябрь куни эрталаб содир бўлган. 34 ёшли футболчи машғулот пайтида ҳушини йўқотган ва икки дақиқа давомида ўзига келмаган.

"Футболчи шифохонага етказилди, у ҳозирда барқарор ҳолатда бўлиб, юракдаги ўзгаришларни аниқлаш мақсадида қўшимча тиббий текширувлардан ўтмоқда. Янги маълумотлар футболчи билан келишилган ҳолда эълон қилинади", — дейилади клуб баёнотида.

Жорий мавсумда ҳужумкор ярим ҳимоячи жамоа сафида 21 та ўйин ўтказиб, 2 та гол урди ва 5 та голли узатма берди.

Манбаларга кўра, Оскар юз берган ҳолат сабаб "Сан-Паулу" билан шартномасини муддатидан илгари бекор қилиш ва футболчилик фаолиятини якунлаш вариантларини кўриб чиқмоқда.