"Челси" яна "Барселона"дан ўйинчи сотиб олмоқчи

«Челси» яна «Барселона» ҳимоячиси Жюль Кундега қизиқиш билдирмоқда ва қишки трансфер ойнасида уни қўлга киритишга уринши мумкин. Бу ҳақда Sports.kz нашри SPORT манбасига таяниб хабар берди.

Маълумотларга кўра, француз футболчи Ханси Флик жамоасида асосий таркибдаги ўрнини йўқотган. Ҳимоянинг ўнг қанотида асосий номзод сифатида Эрик Гарсия кўрилмоқда. Кунденинг майдондаги вақти қисқариб бориши эса уни сотиб олишни истаган клублар эътиборини кучайтирган.

«Премьер-лига»нинг бир нечта жамоаси унинг атрофидаги вазиятни яқиндан кузатяпти. „Челси“ ёздаёқ Кунде билан қизиққан, лондонликлар энди бу вариантга яна қайтишга тайёр», — дея таъкидлади журналист Маттео Моретто La Pizarra дастурида.

Хабарларга кўра, Лондон клуби январдаёқ трансфер имкониятларини ўрганиб чиқмоқчи. Бироқ келишув кўп жиҳатдан «Барселона»нинг молиявий талабларига боғлиқ бўлади. Каталония клуби Кунде учун камида 50 миллион евро сўраши кутилмоқда. Bild нашри маълумотига кўра, француз ҳимоячисига «Бавария» ҳам қизиқиш билдирган.

Шу билан бирга, футболчининг ўзи ҳозирча жамоани тарк этиш фикрини кўриб чиқмаяпти. У Барселонадаги ҳаётидан мамнун ва яқин вақт ичида ўйин амалиётини ҳамда асосий таркибдаги ўрнини қайта тиклашни мақсад қилган.