Чемпион аниқ, аммо қолганлар-чи? Суперлигада муҳим палла

Бугун Суперлигада 24-тур старт олади. Беллашувлар 7-10 ноябрь оралиғида ўтказилади. Чемпион номи аниқ, энди қолган ўринлар ва лигада жон сақлаш учун кураш жиддий тус олган.

7 ноябрь

16:00. ОКМК – “Олимпик”

24-тур Тошкент дербиси билан бошланади. Унда Миржалол Қосимов жамоаси Денис Коростиченко бошқараётган клубни қабул қилади. ОКМК 40 очко билан 2-ўринда. Улар 2-ўринни қўлдан бой бермаслик учун ўз майдонидаги учрашувда ютиши шарт. “Олимпик” қанчалик қаршилик кўрсатишини кузатамиз.

18:15. “Динамо” – “Локомотив”

Крестининни истеъфога чиқариб, Колосовскийни расман бош мураббий этиб тайинлаган “Локомотив” Самарқандда “Динамо” билан ўйнайди. “Локо”да мавсум бошидан буён учинчи мураббий алмашишига гувоҳ бўлдик. Ўйин бўйича ҳам, натижа жиҳатидан ҳам Абрамов жамоаси рақибидан устунроқ. “Металлург”ни қутқариш йўлида натижаларни яхшилай олмаган Колосовский “Локомотив”ни қутқара олармикин? Мураббийлар ўзгаргани “Локомотив”га қанчалик таъсир қилганини Самарқанддаги учрашувда кўрамиз.

8 ноябрь

18:15. “Бунёдкор” – “Металлург”

Охирги ўринга “михланиб” қолган “Металлург” Колосовский кетгач, ўтган турда ОКМК билан баҳсда яхши таассурот қолдирди ва бир очко ишлади. Бекободликлар қандай бўлмасин ғалаба қозониш учун бор имкониятини ишга солади. “Бунёдкор”га ҳам натижа керак. Битта гол ўйин тақдирини ҳал қилиб кетиши мумкин.

9 ноябрь.

16:00. “Навбаҳор” – “Пахтакор”

Турнинг марказий беллашувларидан бири Наманганда ўтади. Одатда, “Навбаҳор” – “Пахтакор” тўқнашуви ўзининг юқори интригаси, жиддий тўқнашуви билан ёдда қолади. Бу сафарги ўйинга жамоалар қандай кайфиятда етиб келишди? “Пахтакор” ОЧЛда муваффақиятсиз иштирокини давом эттиряпти. Наманганга келишдан аввал “Ал-Райян”га ютқазди. Чемпионатда 2-ўрин учун имконияти сақланиб турибди. “Навбаҳор” Жамшид Болтабоевнинг дубли эвазига Тошкентда “Олимпик”ни ютиб қайтди. “Навбаҳор” ва “Пахтакор” бир-бирига принципиал рақиблар. Ўйин шиддати шунга яраша кечса керак.

17:00. “Насаф” – “Сўғдиёна”

Муддатидан аввал ўз тарихида илк бор Ўзбекистон чемпионлигини қўлга киритган “Насаф”га “Сўғдиёна”га қарши учрашувдан кейин айнан чемпионлик Кубоги топширилади. Аммо қаршиликлар бу баҳсга қадар ОЧЛ 2 доирасида ўз майдонида “Ал-Хуссайн”га мағлуб бўлди. Бу жиззахликлар билан учрашувда жамоа ва мухлислар кайфиятига таъсир кўрсатмаса керак. Ҳар ҳолда Рўзиқул Бердиев жамоаси учун асосий мақсад Суперлигани ютиш эди ва буни уддалашди. Ўша куни “Сўғдиёна”га медаллар учун курашиш йўлидаги имкониятини яхшилаш учун ғалаба сув ва ҳаводек зарур.  

18:15. “Сурхон” – “Нефтчи”

Яхши ўйин бўлади. Охирги иккита турдан бери иккала жамоа ғалаба қозониб келяпти. Айниқса, “Сурхон” Жиззахда “Сўғдиёна”га аввалига 2:0 га ютқазаётиб якунда уни 2:4 га айлантиргани эътиборга молик. Левченко танқидлардан сўнг охирги турларда жамоани ўзига келтириб қўйди. Ҳозирча имкониятлар тенг.

10 ноябрь

17:00. “Андижон” – “Қизилқум”

Тур “Андижон” – “Қизилқум” учрашуви билан якун топади. Турнир жадвалида бу клублар ёнма-ён. Фақат навоийликлар бир очко кўп жамғарган. Агар “Андижон” ўз уйида ютадиган бўлса, табиийки, “Қизилқум”ни ортда қолдиради. Кўпчилик мезбонларнинг имкониятини юқори баҳоламоқда.

Шуҳратбек Жўраев.