Чемпион жамоа Салоҳ учун уч футболчисини "қурбон" қиладиган бўлди

“Ливерпуль” билан шартномаси якунланиб бораётган Муҳаммад Салоҳ олдида кутилмаган вариант пайдо бўлди.

Италиянинг амалдаги чемпиони “Интер” 32 ёшли ҳужумчини яна А Серияга қайтармоқчи.

Миланликларда ёзда машҳур тўпурарни эркин агент мақомида бепул қўлга киритиш имкони бор. “Интер” хўжайинлари Муҳаммад Салоҳ талаб қиладиган катта миқдордаги маошни тўлаш учун таркибда жиддий ўзгаришлар қилишга тайёр.

Бунинг учун клуб Марко Арнаутович, Меҳди Тареми ва Хоакин Корреа каби тажрибали ўйинчиларини сотиб юборишни мўлжаллаяпти.

Муҳаммад Салоҳ айни пайтда “Ливерпуль”даги ҳар бир мавсум учун 11,7 миллион евро маош олмоқда. Бу сумма Италия клубларига оғирлик қилади. Шу боис, “Интер” ўз режасини амалга ошириш учун мисрлик ўйинчи билан маош масаласида келишиб олиши талаб этилади.