Чемпионлар лигасида энг кўп гол урган инглизларни биласизми? Ҳарри Кейндан зўрлари бор экан

Чемпионлар лигаси Европа миқёсидаги энг нуфузли мусобақа ҳисобланади. Статистика экспертлари ушбу турнирда энг кўп гол урган англиялик футболчилар рейтингини тузиб чиқди.

Улар орасида ҳали ҳам ушбу мусобақада жавлон ураётган ўйинчилар бор. Демак, тўпурарлар билан танишиб оламиз.

Энди Коул – 18 та гол

“Манчестер Юнайтед”да ўйнаган Коул етти йил давомида Чемпионлар лигасида жами 18 та тўп киритган.

Стивен Жеррард – 21 та гол

“Ливерпуль” афсонаси “Энфилд”даги 17 йиллик карьераси давомида энг нуфузли мусобақада рақиблар дарвозасини 21 мата ишғол қилган.

Фрэнк Лэмпард – 23 та гол

“Челси” тарихида ўчмас из қолдирган Лэмпард халқаро майдонда 23 та гол муаллифи бўлган.

Пол Скоулз – 24 та гол

“Манчестер Юнайтед”нинг “малла” футболчиси Чемпионлар лигасидаги 124 та учрашувда ажойиб зарбаларидан кейин 24 та голни нишонлаган.

Ҳарри Кейн – 25 та гол

“Тоттенхэм”да кўп гол ургани билан қўли қуруқ қолган форвард энди “Бавария”га ёрдам беряпти. Умумий ҳисобда Кейн голлари сонини 25 тага етказиб олди ва Чемпионлар лигасидаги юришини давом эттирмоқда.

Раҳим Стерлинг – 27 та гол

Стерлинг “Манчестер Сити”да ўйнаган кезлари Чемпионлар лигасида 82 та учрашувда 27 та гол урган. Ҳозирги жамоаси “Челси” учун бу турнирга чиқиш орзулигича қолмоқда.

Уэйн Руни – 30 та гол

“Манчестер Юнайтед” афсонасига айланган Руни клублар ўртасидаги энг нуфузли турнирда 30 та тўп киритган. Ҳозир мураббийлик қилаётган Уэйн бу кўрсаткич бўйича рекордчи ҳисобланади.