Чирчиқда Ўзбек жанг санъати бўйича Ўзбекистон чемпионати ўтказилди

Жорий йилнинг 5-8 февраль кунлари Чирчиқ шаҳридаги Ўзбекистон давлат жисмоний тарбия ва спорт университети манежида миллий спорт туримиз  - Ўзбек жанг санаъти бўйича ўсмирлар,  ёшлар ва катталар ўртасида Ўзбекистон чемпионати баҳслари бўлиб ўтди. 

Ўзбекистон Республикаси спорт вазирлиги ҳамда Ўзбек жанг федерациясининг 2026 йил тақвим-режасидаги  дастлабки мамлакат чемпионатида Қорақалпоғистон Республикаси, Тошкент шаҳри ҳамда барча вилоятлардан 1000 нафардан ортиқ спортчилар Ўзбек жанг санаътининг "Беллашув" йўналиши бўйича куч синашишди. Юқори савияда, муросасиз ва шиддатли тусда ўтган мусобақанинг биринчи кунида тантанали очилиш маросими ташкил этилди.

Маросимда Ўзбек жанг санъати федерацияси раиси Пўлат Усмонов,  Ўзбекистон давлат жисмоний тарбия ва спорт университетининг проректори Шерзод Мирзанов ва бошқалар иштирок этиб, спортчиларга омад тилади. 

Якуний натижаларига кўра, умумжамоа ҳисобида фахрли биринчи ўринни Тошкент вилояти жамоаси қўлга киритган бўлса, иккинчи ўринни Андижон ва Бухоро вилояти жамоалари эгаллади. Учинчи ўрин Сирдарё ҳамда Жиззах вилояти спортчиларига насиб этди. Барча вазн тоифаларида кучли учликдан жой олган атлетлар медаль ва диплом билан тақдирланишди. Шунингдек, мусобақа олдидан федерация раҳбари Пўлат Усмонов бошчилигида 500 нафарга яқин Ўзбек жанг санъати мураббийлари учун  ўқув- амалий семинар ҳам ташкил этилди.

Таъкидлаш жоиз, Ўзбек жанг санъати спорт тури бўйича жорий йил нуфузли халқаро мусобақалар ўтказилади ва мазкур чемпионат ёш тоифаларига кўра, терма жамоаларга саралаш вазифасини ўтаб бериши билан ҳам аҳамиятли бўлди.