Дана Уайт: "Шон Стрикленд қачон мамнун бўлган?!"

UFC раҳбари Дана Уайт амалдаги шартнома шартларини қайта кўриб чиқмасдан октагонга чиқишдан бош тортаётган амалдаги чемпион Шон Стрикленд жорий йилнинг май ойида лига билан янги шартнома имзолагани ҳақидаги маълумотни тасдиқлади.

"Йўқ, шахсан мен у билан гаплашмаганман. Бу ҳақда фақат ижтимоий тармоқлар ва бошқа манбалардан эшитдим. Лекин Шон охирги марта қачон бирор нарсадан мамнун бўлган?! Стрикленд фақат май ойида янги шартнома имзолади.

Атиги тўрт-беш ой олдин у янги шартнома тузди. Эшитишимча, у айтган сумма ҳақиқатга тўғри келмайди. Агар у бир ёки икки йил бир хил шартномада бўлганида, вазият бошқача кечарди. Аммо Шон май ойида тўлиқ янгиланган шартномага эга бўлди", - деди Уайт матбуот анжуманида.

Эслатиб ўтамиз, Стрикленд шу йилнинг декабрь ойида Нассурдин Имамовга қарши чемпионлик камарини ҳимоя қилиши режалаштирилган эди, бироқ чемпионнинг янги молиявий талаблари туфайли жанг бўйича музокаралар боши берк кўчага кириб қолди.