Даврон Файзиев: Биринчи гол киритилган вазиятда офсайд бордек туюлди

Суперлига 17-туридан ўрин олган “Қизилқум” – “Динамо” (2:1) учрашувидан кейинги матбуот анжуманида дастлаб меҳмонлар устози Даврон ФАЙЗИЕВ ўйин ҳақидаги фикрлари билан ўртоқлашди. Бу ҳақда "Қизилқум" клуби матбуот хизмати хабар берди.

- Нима дейишгаям ҳайронман... Биз Навоийга ғалаба иштиёқида келгандик. Бу мағлубиятлар кўпроқ жамоани руҳан синдириб қўяди. “Қизилқум”ни ғалаба билан табриклайман. Улар ўйинни ҳужумкорлик руҳида давом эттиришди. Биз қарши ҳужумлардан унумли фойдаланишни режалаштиргандик. Афсуски, бу ниятимиз амалга ошмади. Бу каби ҳолатдан чиқиб кетишимиз керак. Йигитларни кейинги баҳсга тайёрлашга ҳаракат қиламиз. “Қора чизиқ” ҳар доим ҳам давом этиши керак эмас... Биринчи гол киритилган вазиятда офсайд бордек туюлди. Аммо бу баҳона эмас. Биринчи бўлимда ҳам худди иккинчи таймдаги сингари ҳаракат қилишимиз лозим эди. Иккинчи даврада ғалаба қозонмадик? Ҳа, Суперлигадаги ҳамма жамоа бир очко бўлсада, қўлга киритди. Биз эса йўқ. Албатта ҳаммаси ўзимизга боғлиқ. Яратилган вазиятлардан фойдалана олмаётганлигимиз бизга қимматга тушаяпти, - деди мураббий.