Даврон Файзиев "эл-класико" даражаси ва жамоалар ўртасидаги фарқ ҳақида фикр билдирди

Бугун Испания Суперкубоги ярим финали доирасида "Реал" ва "Барселона" ўзаро баҳс олиб боради. Мазкур қарама-қаршилик олдидан машҳур шарҳловчи Даврон Файзиев ўз фикрлари билар ўртоқлашди:

"Ёки аввалги "эл-классико"лар жудаям оловли эди ё ҳозир ҳаддан ташқари тинч. Турнир даражасимикан, яъни, Ла Лига эмас Суперкубок. Қаралмасди шекили турнир-пурнирига? Хави ҳам кеча интервьюсида "Реал" Испанияда ҳозир кучлидир, биз барибир уларга муаммо туғдира оламиз дебди. "Барселона" шунчаки муаммо туғдира олади. Нима? Демак ҳозир жамоаларнинг ҳолатида фарқ ростдан ҳам катталашган. Асосий сабаб шу.

Икки томон ҳам вазиятни тушуниб турибди. Шундай бўлса-да, бир ўйинда ҳар нарса рўй бериши мумкин. Тўғри ёндашув, керакли тактика, ирода, интилиш ва жамоавий ўйин йўлга қўйилса, формадаги фарқ йўққа чиқади. Шунда кескин "классико" юзага келади. Бошқачаси керакмас. Ҳуллас дўстлар, бугун ўша кун. Учрашув 00:00 да бошланади. Кўрсатиладими, деган саволлар кўп бўлмоқда. Йўқ, афсуски, кўрсатилмайди. Ўзбекистон ҳудудида мавжуд телеканаллар Испания Суперкубоги трансляцияси ҳуқуқига эга эмас. Тафсилотларни ёзиб боришни режа қилганман".