Дест: «АҚШга бироз омад етмади»

АҚШ терма жамоаси ҳимоячиси Сержиньо Дест ўз миллий терма жамоасининг жаҳон чемпионатидан чиқиб кетганлиги ҳақида фикр билдирди.

1/8 финал доирасидаги ўйинда америкаликлар Нидерландияга имкониятни бой беришди (1:3).

«Катта омадсизлик! Бироқ биз жамоа бўлиб ватанимиз учун боримизни бердик, афсуски, ўша оқшом бироз омад кулиб боқмади. Мен жамоадан ва бутун турнир давомидаги курашувчанлик қобилиятимиздан жуда ҳам фахрланаман. Бу жамоада жуда кўп иқтидорлар бор ва кўпчилигимиз ҳали ёшмиз ва ривожланиш учун кўп вақтимиз бор.

Уч ярим йилдан сўнг, 2026 йил ёзида, ўз она заминимизда бўладиган мундиал учун жиддий тайёрланамиз. Қўллаб-қувватлаганингиз учун барчангизга раҳмат, биз буни бутун турнир давомида ҳис қилдик», - деди Дест.

Эслатиб ўтамиз, 2026 йилги жаҳон чемпионати учта давлатда бўлиб ўтади: АҚШ, Канада ва Мексика.