Дилшод Комилов: "Тарихда биринчи марта "Насаф" билан бирга чемпионликни нишонламоқчиман"

Сайтимиз орқали ҳимоячи Дилшод Комиловнинг “Локомотив”дан “Насаф”га кўчиб ўтгани борасида хабарлар бериб ўтдик. Барча расмиятчиликлар ҳал бўлганидан сўнг футболчи “Насаф”нинг янги футболчиси сифатидаги илк интервьюсини Sports.uz сайтига берди.

- “Насаф” клубига ўтишингиз кўпчилик учун кутилмаган янгилик бўлди. Ҳаммаси қандай юз берди?

- Туркиядаги йиғин жараёнида агентим менга “Насаф”дан таклиф тушганини билдирди. Шу билан амалга ошиб кетди. Бундан олдин ҳам чемпионат бўлаётган маҳалда “Насаф” билан ўртамизда қизиқиш бўлганди. Кейин улар ҳали ҳам қизиқишинг борми деб сўрашди. Сўнгра “Локомотив” раҳбарияти билан гаплашиб, ўзаро келишган ҳолда “Насаф”га ўтишим амалга ошди.

- “Локомотив”га бу йил қайтгандингиз. “Насаф” билан эса 1,5 йиллик шартнома имзоладингиз. Демак, “Насаф” сизни “Локомотив”дан сотиб олдими?

- Ҳа, трансфер бўлди. Сотиб олишди.

- “Насаф” аъзосига айландингиз ва нималарни ҳис қиляпсиз?

- Ижобий. Ўзингиз ҳам билиб турибсиз, бу чемпионлик учун курашаётган жамоа. Осиё Чемпионлар лигасида ҳам қатнашади. Мен учун олдинга қадам ташлаш. Уйдагилар билан маслаҳатлашим ушбу қарорга келдим.

- “Насаф”да қайси рақамни танладингиз?

- 4-рақам.

- Кўпинча ушбу рақамда ўйнайсиз. Сиз учун нимани англатади?

- Ёшлигимда дадам 4-рақамни яхши кўрарди. Ўзимга ҳам бу ёқади.

- Рўзиқул Бердиев билан илк суҳбатингиз қандай бўлди?

- Яхши кечди. Жамоага киришиб кетдим. Биринчи машғулотимни ҳам ўтказдим. Клубда мени яхши кутиб олишди.

- “Локомотив” биринчи даврада ўз имконияти даражасида қатнаша олмади, мураббийлар ҳам алмашди. Сизнинга, нима бўлди?

- Про лигадан чиққан ва янги шаклланаётган жамоа эди. Нима десам экан, омад етишмади, деб ўйлайман. Бошида яхши бошлагандик. Кейин кетма-кет мағлубиятларга учрадик, бу вазиятдан чиқиб кетишимиз қийин бўлди.

-  Балки “Локомотив”даги омадсизлик ҳам сизни у ердан кетишингизга сабаб бўлгандир?

- Йўқ, бу сабаб эмас. Менга янги чақирув бўлганди. Ҳозирги пайтда тўғри қарор қабул қилдим, деб ўйладим.

- “Насаф”даги мақсадингиз қандай?

- Олий мақсад – чемпионликни қўлга киритиш. Тарихда биринчи марта “Насаф” билан чемпионликни бирга нишонламоқчиман.

Шуҳратбек Жўраев.