Дилшод Раҳматов: "Яратилган шароитлардан жаҳлим чиқиб кетди"

Ўзбекистон футзал терма жамоаси сардори Дилшод Раҳматов яқиндагина ижтимоий тармоқлардаги пости орқали кўплаб шов-шувларга сабаб бўлди. Биз, футзалчимиз билан боғланиб, уни нега хафа бўлгани билан қизиқдик. Шу билан биргаликда, келажакдаги режалари билан ҳам қизиқиб кўрдик.

- Инстаграмдаги постингиз кимга қаратилган эди?

- Ижтимоий тармоқдаги постимни изоҳлаб ўтишим шарт. Хабарингиз бор, биз мусобақаларга тайёрланиш жараёнида Тожикистонга қарши бир нечта учрашувда майдонга тушдик. Ўша куни Таиланд терма жамоаси ўз юртида катта турнир ўтказаётгани ҳақидаги хабарни ўқиб қолдим. Эрон, Вьетнам, Марокаш сингари кучли терма жамоалар билан ўз уйида чинакам мусобақа ўтказиш Таиланд учун катта плюс. Биласизми, чемпион бўлишни мақсад қилган жамоалар мана шундай катта ўйинларда иштирок этишга одатланган. Айнан шу нарсани ёзмоқчи эдик. Ёдингизда бўлса, аввалари бизда "Tashkent Cup" турнири ташкил этилар Беларусь, Қозоғистон, Россия, Озарбайжон сингари мамлакат вакиллари иштирок этган. Афсуски, бизда бундай мусобақаларни ташкил этилмаяпти. Тўғри, кимлардир ўтган йили Аргентина сингари жамоалар билан тўп тепганимизни пеш қилиши мумкин, аммо у бир йил олдин содир бўлди.

Бу йил ҳаммасини бошидан бошлаш керак. Ҳамма жамоалар ривожланмоқда. Шундай экан, ҳозир ўтмишдаги устунлигимизга суянишимиз жуда кулгули. Испаниялик мутахассис Хосе Мария Мендес даврида айнан шу нарсага урғу берилган эди. Кучли спарринг рақиблар билан тўқнашувда у асосан ёшларни синаб олар эди. Энг кулгулиси шундаки, Тошкентда биз билан 3 маротаба тўқнаш келган Тожикистон терма жамоаси билан Осиё чемпионатида бир гуруҳда жойлашганмиз. Мантиқ қани?

Осиё чемпионатига кетишдан олдин Кувайтда Индонезия билан ўртоқлик учрашуви ташкил этилиши кутилмоқда, бироқ бу бизни даражамиздаги ўйинлар эмас. Катта турнир олдидан кучли рақиблар бизни камчиликларимизни кўрсатиб бериши мумкин. Ёдимда бор, Эрон билан икки маротаба ўртоқлик ўйинида тўп тепгач, жуда кўп муаммоларимизни билиб олгандик. Айниқса, ҳимоядаги хатоларимизни Аргентина билан тўқнашувда кўриб олдик. Билмадим, Туркманистон, Тожикистон сингари ўзимиздан нисбатан кучсизроқ жамоалар билан ўртоқлик ўйини ўтказишдан кимга фойда? Улар учун бўлиши мумкин, амма бизга эмас!

Бу қўйилган пост ҳеч кимга қаратилмаган. Шунчаки, менга алам қилди. Мақсадимиз чемпионлик, деб фақат гапда айтилмоқда. Қуруқ баланд-парвоз гап билан ҳеч нарса ҳал бўлмайди. Кўпроқ шароит яратиб берилиши лозим. Ўзбекистон футзал терма жамоасининг даражасини Қирғизистон, Туркманистон ёки Тожикистондан анча баланд. Ҳозир бор формамизни ҳам йўқотиб қўймаслик шарт. Бундай паст темпдаги баҳслар ёш футзалчиларга жуда салбий таъсир кўрсатади.

- “Жиззах Кентекс” лойиҳаси давом этадими?

- Бу лойиҳа янгиланди, аммо мақсадлар ўзгаргани йўқ. Янги рақобатдош жамоалар пайдо бўлмоқда. Бир неча йиллардан бери Ўзбекистон чемпионатида тўп тепаётганим боис, чемпионлик учун асосий омил нима эканлигини яхши биламан. Ким шижоат ва кучли иштиёқ билан тўп тепсагина якунда олтин медалларга эга чиқади. Ўйлашимча, бизни жуда қизиқарли чемпионат кутиб турибди.

Ҳозир янги ҳомийлар билан учрашдик. Шунингдек, асосий ҳомийимиз Жиззах вилояти ҳокими Салиев Эргаш Алибекович ўзбек футзали ривожи учун ўз ҳиссасини қўшишда давом этмоқда. Ўйлашимча, бундай имкониятлардан унумли фойдаланиб, чемпионликни нишонлашимиз керак. Ўтган йилги ғолиблигимиз замирида ҳам айнан уларнинг ҳизматлари улкан.

- Мураббийлик фаолиятингизни қачон бошлашни режа қилгансиз? Бу борадаги ишлар қандай кетмоқда?

- Ўқув курсларини тугатдим. Керакли сертификатларни қўлга киритдим. Келажакда мураббий бўлиш ниятим бор. Ҳозир футзал мактабини очиш билан бандман. Тез орада, бу ҳақидаги батафсил маълумотлар берилади. Уларни футзалдан футболга ҳам ўта оладиган даражада маҳоратли қилиб тарбиялашни режалаштиряпмиз.

- Футзалдаги келажагингизни қандай кўряпсиз?

- Режаларимга келадиган бўлсак, Жиззахда яна узоқ вақт қолишим аниқ. Миллий терма жамоада 10 йилдан бери қитъа биринчиликларида медаль олиб келябмиз, аммо ҳеч қачон биринчи ўринни эгалламадик. Насиб қилса, бу сафар шу камчиликни тўғрилашга уриниб кўрамиз.