"Динамо" Файзуллаевни нега олмаган?

Россия Премьер-лигасининг 16-турида Москванинг икки клуби – ЦСКА ва “Динамо” ўзаро тўқнашди.

Учрашув қаҳрамонларидан бири Аббосбек Файзуллаев бўлди. 20 ёшли футболчимиз биринчи бўлимда фаол ўйнади. Ўзи узоқ масофадан супергол урди. Кейин мураккаб вазиятда турганига қарамай, Антон Заболотнийга жуда қулай пас узатди.

Ўйиннинг иккинчи ярмида “динамочилар” катта устунлик қилди. Оқибатда ўйин уларнинг 3:2 ҳисобидаги ғалабаси билан якунланди.

Журналистлар “Динамо” клуби директорлар кенгаши аъзоси Дмитрий Гафиндан жамоа ҳақиқатан ҳам Аббосбек Файзуллаевни кузатгани ҳақидаги маълумотларга муносабат сўради.

Гап шундаки, бир неча куни аввал, бир неча ўзбек футболчилари манфаатини ҳимоя қилаётган таниқли футбол агенти Герман Ткаченко Файзуллаевда “Динамо”га ўтиш варианти бўлганини таъкидлаган эди.

- Биз Москванинг “Динамо” клубига Файзуллаевни олишни тавсия қилгандик. Улардан жавоб бўлмади. Апрель ойида ёшлар ўртасидаги Осиё чемпионатида Аббосбек Файзуллаев энг яхши ўйинчи бўлган эди. Ўша турнирдан кейин ЦСКА уни кузатиб боришини билдириб, ижара масаласини ҳал қилишни сўради.

Яна иккита жамоа уни жуда қаттиқ қизиқиш билдирди ва бизни қийнаб юборди. Булар “Пари Нижний Новгород” ва “Алания”. “Алания”нинг скаутлари жуда яхши ишлайди, - деган эди Герман Ткаченко.

Дмитрий Гафин ҳам бу маълумотларни тасдиқлади.

- Кузатувимизда жуда кўп футболчилар бор эди. Хусусан, Аббосбек Файзуллаев ҳам. Уни агентлар тавсия қилди, биз унинг номзодини кўриб чиққанимиз рост.

Лекин кўриб чиқиш жараёнида унинг позицияси бошқа футболчи билан тўлдирилган эди. Футболда бунақаси бўлиб туради. Файзуллаев жуда яхши футболчи.

Биз айни пайтда Англия Премьер-лигасида порлаётган кўп ўйинчиларни олишга жуда яқин келгандик. Айрим сабабларга кўра, бу трансферлар амалга ошмай қолган. Бу борада Аббоснинг масаласи ягона эмас, - деди Дмитрий Гафин.

“Пахтакор” тарбияланувчиси бўлган Аббосбек Файзуллаев август ойининг бошида ЦСКАга кўчиб ўтди. Кўпчилик илк маротаба легионерга айланган ҳужумкор футболчи мураккаб лигада ўйнаб кетишга қийналишини таъкидлаган эди.

Бироқ Файзуллаев қисқа фурсатда ЦСКА етакчисига айланди. 20 ёшли ҳамюртимиз биринчи давранинг энг асосий кашфиёти сифатида эътироф этилди.

Аббосбек Россияга кўчиб ўтганидан кейин жами 15 маротаба майдонга тушиб, иккита гол ва еттита ассист муаллифи бўлди.

Файзуллаевнинг устози Россия клубларига яна икки футболчини тавсия қилди

Буни Файзуллаевдан ҳеч ким кутмаганди

Шомуродов қадрдонинг бўлса, жамоангга чақир!

Легионеримиз: Асосий таркибда ўйнашга тайёрлигимни исботлайман

Мураббий бу гапларни Файзуллаев кетиб қолгани учун айтган