Дориевнинг эгоси кучлими? Бошкович нега матбуот анжуманида иштирок этмади? (Матбуот анжумани)

Ўзбекистон Суперлигаси 10-туридан ўрин олган "Сурхон" - "Сўғдиёна" баҳси якунланди. Унда майдон эгалари 1:0 ҳисобида рақибдан устун келди. 

Беҳруз Шайдулов томонидан 68-дақиқада киритилган гол уларга ғалаба келтирди. 

Беллашувдан сўнг ҳар икки жамоа бош мураббийлари иштирокида матбуот анжумани бўлиб ўтиши керак эди. Бироқ меҳмонлар устози Иван Бошкович қизил карточка туфайли анжуманда иштирок эта олмади. Унинг ўрнига Улуғбек Боқиев журналистларнинг саволларига жавоб берди.  

Авваламбор, ҳаммага ассалому алайкум. "Сурхон" жамоасини бугунги ғалаба билан табриклайман. Ўйинга келадиган бўлсак, "Бунёдкор"га қарши баҳсда ўзимизнинг энг яхши учрашувлримиздан бирини ўтказгандик. Бугун ҳам шундай кутилма бор эди. Бугун ўзимизда бор имкониятлардан фойдалана олмадик ва айрим вазиятларда футболчиларга совуққонлик етишмади. 

"Сўғдиёна" ҳужумчилари тартибли ва орқа чизиқда ўйнайдиган жамоаларга қарши ўзини кўрсата олмаяпти. Бунга сабаб нима?

Бундай деб ўйламайман. Ҳимояда зич ҳаракат қилиб, қарши ҳужумга қарши чиқадиган ва очиқ ўйин кўрсатадиган жамоаларга қарши ҳам бир хил ўйнашга ҳаракат қиляпмиз. Ҳар бир учрашувга алоҳида тайёрланамиз. Шунчаки, баъзан бизга совуққонлик етишмаяпти. Ҳозир танаффусга чиқяпмиз ва кучлироқ бўлиб қайтишга ҳаракат қиламиз. 

Люпче Дориев жуда кўп эпизодларда тўпни қизғоняпти. Унинг эгоси кучайиб кетгандек туюлмаяптими? 

Саволингиз нотўғри, деб ҳисоблайман. Футбол жамоавий спорт тури. У гол ураётган ёки ассист қилаётган бўлса, бунда шерикларининг ҳам ҳиссаси бор. У бугун ўтган сафаргидаги каби ўз ўйинини кўрсатгани ҳаракат қилди. Совуққонлик етишмагани сабабли у ва бошқалар ўз имкониятларидан фойдалана олмади. Люпче билан 1.5 йилдан бери бирга ишлаётган бўлсак, унда эгони кўрмаганман. У жуда самимий ва очиқ кўнгил йигит. Дориев тўпурарлар жадвалида биринчи ўринга чиқиш учун эмас, жамоага ёрдам бериш учун ўйнаяпти. 

Ўйиндан кейин бош ҳакам Бошковичга қизил карточка кўрсатди. ЎзПФЛ ходимлари айтишдики, матбуот анжуманига кириш мумкин эмас экан. 

Ҳужумчининг ўйини чиққани ёки чиқмаганини голлар билан баҳолашимиз нотўғри бўлади. Самандар Мавлонқулов ҳужум чизиғида ўз ҳаракатлари билан ҳимоячиларни шошириб қўймоқда. Унинг потенциали жуда юқори ва келгусида терма жамоада ҳам ўйнашига ишонаман. 

"Сўғдиёна" голдан сўнг ўзини йўқотиб қўйди. Жамоа бундай ҳолатларга тайёр эмасми?

Бунақа вазиятларга биз доим тайёр турамиз. Гол урганимиздан кейин кимни майдонга туширамизни ёки гол ўтказиб юборганимиздан сўнг қайси тактикага ўтишимизни учрашув аввалида келишиб оламиз. Айниқса, гол ўтказиб юборганимиздан сўнг бироз активлашдик. Яратган хавфли вазиятларимиз ҳам айнан ўша воқеадан сўнг содир бўлди. Ўйлайманки, келаси беллашувларга яна ҳам пухта тайёрланиб, мухлисларимизни хурсанд қиламиз, деган умиддамиз.