Дьёкереш “Арсенал”нинг мағлубиятига майдон чимини сабаб қилиб кўрсатди

“Арсенал” шанба куни Англия чемпионати 32-тур доирасида ўз майдонида “Борнмут”га 2:1 ҳисобида мағлуб бўлди. Учрашувдан сўнг, “тўпчилар" ҳужумчиси Виктор Дьёкереш майдоннинг ҳолатига шикоят қилди.

“Эҳтимол, чим бироз қуруқ бўлгандир. Бу бизга ёрдам бермади. Ютқазиш ҳар доим оғриқли, аммо олдинда кўплаб ўйинлар бор. Биз кучли жамоа эканлигимизни биламиз", - деди Дьёкереш ўйин якунидан кейинги интервьюсида.

Эслатиб ўтамиз, Дьёкереш жамоасининг ягона голига муаллифлик қилди. Швециялик ҳужумчи пенальтидан гол уришга муваффақ бўлди, аммо бу жамоасининг ғалабаси учун етарли бўлмади. 32-тур якунига кўра, Лондон клуби ҳамон етакчиликни сақлаб турибди. Иккинчи ўринда "Манчестер Сити" уларни тақиб килиб келяпти, орадаги фарқ 9 очкони ташкил етмокда.