ЕЧЛ.

УЕФА Чемпионлар Лигаси ярим финалидан ўрин олган иккинчи учрашув ўз якунига етди. "Жозе Алваладе" стадионида кечган учрашувда "Бавария" "Лион" устидан 3:0 ҳисобида ғалаба қозонди. 

Биринчи таймда Гнабри дублни расмийлаштирган бўлса, учрашув якунланиши арафасида Левандовски ҳисобни йирик кўринишга олиб келди.

Энди мюнхенликлар 23 августдан 24 августга ўтар кечаси ПСЖ билан бош соврин учун кураш олиб боради.

Лион

    UEFA ЧЛ Финал бочқичи Ярим финал

    20/08/2020, 00:00

    0
    :
    3
    Тугади

    Бавария

    • Серж Гнабри 18', 33'
    • Роберт Левандовский 88'

    Стадион: Estadio Jose Alvalade 0 томошабин

    Бош ҳакам: Antonio Mateu

    45'
    90'

    • 90+4'

      "Бавария" финалда! Уларни ким тўхтатади?! Учрашув якунланди. Матнли трансляция Жавоҳир Азимов томонидан олиб борилди.

    • 90+2'

      Сўнгги дақиқаларда ҳам "Бавария" футболчилари тинмаяпти.

    • 90'

      Бош ҳакам Матеу Лаос учрашув асосий вақтига 3 дақиқа қўшиб берди.

    • 88'

      ГООООООООООЛЛЛЛЛЛЛ!

      Бугун у гол урмаса бўлмас эди! Киммихнинг заргарона узатмасидан кейин Левандовски ҳам ўз исмини таблога ёздириб қўйди.

    • 86'

      Киммихнинг танасига оёқлари билан зарба берган Тиаго Мендес жазоланди.

    • 84'

      Ауарнинг жарима майдончаси чизиғидан берган зарбасини Нойер ушлаб олди.

    • 83'

      Флик майдон марказини янгилади: Горецка ва Алькантара ўрнига Павар ҳамда Толиссо ўйинга қўшилди.

    • 82'

      Горецканинг жуда ҳавфли тус олиши мумкин бўлган зарбаси офсайддаги Мюллерга тегиб қайтди.

    • 80'

      Коутиньонинг навбатдаги уриниши гол билан якунланди. Аммо олдинроқ ўйиндан ташқари ҳолат қайд этилганди.

    • 78'

      Ҳозиргина ўйинга қўшилган Коутиньо ҳавфли зарба берди. Лопеш вазиятни бартараф этди.

    • 75'

      "Қизиллар" таркиби ҳам янгиланмоқда: ўйин қаҳрамони Гнабри ўрнига Коутиньо майдонга туширилди.

    • 74'

      Флик шогирдлари тўп назоратини қўлга олган ҳолда, рақиб шаштини сўндиришга уринмоқда.

    • 72'

      Марсал ўрнига Райан Шерки тушди.

    • 69'

      "Лион"га гол сув ва ҳаводек зарурлигини клуб вакиллари ҳис қилмоқда. Бироқ мюнхенликлар ҳимояси бехато ўйнамоқда.

    • 67'

      Руди Гарсия охирги ўзгаришларини ҳам амалга оширди: Токо-Экамби ва Дюбуа ўрнига Рен-Аделаид ҳамда Тете туширилди. Франциялик мураббийнинг сўнгги умиди улардан.

    • 66'

      2 рақибини алдаб, жарима майдончасига ёриб кирган Ауарни Алаба тўхтатди.

    • 65'

      Жамоалар майдон маркази учун қаттиқ кураш олиб бормоқда

    • 63'

      Перишич майдонни тарк этди. Қолган вақт давомида унинг ўрнида Коман ўйнайди.

    • 61'

      Руди Гарсия шогирдлари голга яқин келмоқда. Кейинги ҳужум нима бўлиши қизиқ.

    • 59'

      Хавфли вазият! Токо-Экамби ўта қулай вазиятдан фойдалана олмади. Унинг зарбаси Нойер томонга йўналди.

    • 58'

      Мемфис Депай ўз ўрнини ўтган ўйин қаҳрамони Мусса Дембелега бўшатиб берди.

    • 56'

      Бурчак тўпидан етказилган узатмани Депай Нойер постига йўллади. Немис киперидан ишончли ҳаракат.

    • 55'

      Жарима майдончаси марказига оширилган тўпни Зюле майдондан ташқарига чиқариб юборди.

    • 53'

      Мюллер рақиьига қарши кескин ҳаракат қилди. Матеу Лаос бу сафар оғзаки огоҳлантириш билан кифояланди.

    • 51'

      Перишич дарвозабон билан бирга-бир вазиятга чиқиб борди ва зарба йўллади. Лопеш ўз ўрнида.

    • 48'

      Иккинчи 45 дақиқалик ҳам аввалгиси каби қизғин курашлар остида бошланди.

    • 46'

      Танаффусда икки мураббийлар ҳам ўзгаришларга қўл урди: "Лион" таркибида Гимараэс иккинчи таймда майдонга қайтмади. Унинг ўрни Тиаго Мендес томонидан тўлдирилди. Шунингдек, мюнхенликлар таркибида Боатенг ўрнига Зюле туширилди.

    • 46'

      Иккинчи тайм бошланди!

    • 46'

      Жамоалар майдонга қайтди. Биз ҳам қайтамиз.

    • 45'

      Бош ҳакам Матеу Лаос биринчи бўлимга вақт қўшиб бермади. Танаффус!

    • 45'

      Алаба катта тажриба соҳиби эканлигини биргина ҳаракати билан ҳам исботлади.

    • 43'

      Рақиблари босимига учраётган Левандовски жамоадошининг дарвоза томон йўналган аниқ зарбаси йўлига тўғаноқ бўлди.

    • 42'

      Бугун Левандовскига нисбатан бироз қўпол ўйин кўрсатилмоқда: бу сафар катта тезликда қарши ҳужумга югураётган рақибини Марсал қоидага зид рақишда тўхтатди.

    • 40'

      Икки гол устунлиги билан олдинда бораётган мюнхенликлар ҳамон прессингни тўхтатгани йўқ. Услуб ўз фойдасини бермоқда.

    • 39'

      Марселонинг бош билан берган зарбаси ноаниқ кетди.

    • 38'

      "Қизиллар"дан яна бир ҳавфли ҳужум: чап қанотдан Гнабри тўп оширди. Очиқ қолган дарвозага Левандовски тўпни киритиб юбора олмади.

    • 35'

      Левандовскига нисбатан қўпол ўйнагани учун Марсело сариқ карточка билан жазоланди.

    • 33'

      ГООООООООООЛЛЛЛЛЛЛ!

      Перишичнинг узатмасидан кейин Левандовски тўпга кўнгилдагидек зарба бера олмади. Унинг ортидан етиб келган Гнабри эса очиқ дарвозага тўп киритиб, дублни расмийлаштирди.

    • 31'

      Киммих тўқнашув оқибатида оёғини жароҳатлаганга ўхшайди. Ҳайрият, унинг ҳолати жойида.

    • 30'

      Левандовскига етказиб берилган тўпга францияликлар посбони чиқиб келди ва уни қайтариб юборди.

    • 27'

      Девис ҳаводан келаётган тўпни ўзига моҳирлик билан бўйсундириб, бир рақибини алдади ва зарба берди. Аммо ҳимоячилар тўп йўлига тўғаноқ бўлишди.

    • 25'

      Левандовскининг жарима майдончаси ичидан йўллаган зарбасини Антонио Лопеш бартараф этди. Бугун унга осон бўлмаслиги аниқ эди.

    • 24'

      Руди Гарсия шогирдлари асло пас кетмаяпти. Уларнинг ҳам уринишлари рақибникидан кам эмас.

    • 22'

      Қандай қулай имконият?! Мюллер жарима майдончаси ичига етказилган тўпга зарба бера олмади. Ваҳоланки, унинг олдида ҳалал бериши мумкин бўлган бирорта рақиби йўқ эди.

    • 20'

      Голдан руҳланган мюнхенликлар ҳужумга ўтишда давом этмоқда.

    • 18'

      ГООООООООООЛЛЛЛЛЛЛ!

      Сен урмасанг, сенга уришади! Гнабри ўз қанотидан рейд уюштирди ва марказга юриб, рақиб постини кучли зарбаси билан ишғол қилди. Қизиқарлиси, 5 нафар "Лион" футболчилари ушбу вазиятда немис вингерини тўхтата олмаганди.

    • 17'

      Руди Гарсия шогирдларидан жуда хавфли ҳужум: қанотдан марказга ёриб кириб, дарвозага зарба йўллаган Токо-Экамби устунни мўлжалга олди.

    • 16'

      Икки жамоа мураббийларининг ҳам ўйинолди режаларида тезкор гол киритиш вазифаси бўлганлиги аниқ. Майдонда ҳаракат қидаётган 22 нафар футболчи 15 дақиқа давомида мутлақо тинмади.

    • 13'

      Жарима майдончасига Корненинг узатмасини Боатенг қайтарди. Тўп ундан ўтганида, Токо-Экамби очиқ дарвоза қаршисида ёлғиз қолиши мумкин эди.

    • 11'

      "Лион"дан муносиб жавоб: Депайнинг узатмасига шериги бироз ета олмади. Акс ҳолда, ўта ҳавфли вазият юзага келар эди.

    • 10'

      Левандовскининг супер узатмасидан кейин қулай имконият ҳосил қилган Горецка тўпга мослаша олмади.

    • 9'

      "Бавария" катта тезликда қарши ҳужумга ўтди. Бироқ рақиблар ҳам етиб келишга улгуришди.

    • 7'

      Ҳар бир ўйинда бўлгани сингари Флик шогирдлари эрта прессинг амалга оширмоқда. Натижада, рақиб хатога йўл қўйишга мажбур бўляпти.

    • 6'

      Киммих бурчакдан тўпни жарима майдончаси марказига етказди. Аммо унинг ҳаракатини жамоадошлари давом эттира олмади.

    • 4'

      Мемфис Депай дарвозабон билан бирга-бир вазиятга чиқди, Нойерни алдади. Охирида эса ноаниқ зарба берди. Бу вазиятни у ҳали узоқ эслаши аниқ.

    • 3'

      Депай чап қанотдан жарима майдончаси ичига ёриб кирди. Аммо унинг уринишини ҳимоячилар бартараф этди.

    • 2'

      Французлар тезкор гол киритмоқчи кўринади. Илк дақиқалардан ҳужумга интилишяпти.

    • 1'

      Учрашув бошланди!

    • 0'

      Жамоалар майдонга тушиб улгуришди ва Чемпионлар Лигаси мадҳияси остида бир қаторда сафланишди.

    • 0'

      Ассалому алайкум муҳтарам футбол мухлислари. Танловингиз марказида эканлигимиздан хурсандмиз!

    Матнда хатолик топсангиз, ўша хатони белгилаб, бизга жўнатинг (Ctrl + Enter)

    Минбар

    Барча блоглар