ЕЧЛ.

Бугун тунда дунё мухлислари интиқлик билан кутаётган Европа Чемпионлар Лигаси турнири доирасида яна 2 баҳс ўтказилади. Деярли барча Европа футболи мухлислари учун чоршанба оқшоми бедорликда ўтиши шубҳасиз. Сабаби, жамоалар номининг ўзиёқ бу учрашувларга бўлган қизиқишни ошириб юборади. Шу сабабли, кўпчилик футбол ихлосмандларига қизиқ бўлган ушбу 2 учрашувга сайтимиз алоҳида тўхталишни лозим деб топди ва ўйлаймизки, бу сиз азиз мухлисларга ҳам манзур бўлади. Биз эса ҳозир “Боруссия” Мёнхенгладбах - “Манчестер Сити” ўйини ҳақида гаплашамиз. Демак, бошладик!

Eu813LkVIAU8X8N

“Боруссия” Мёнхенгладбах

Мёнхенгладбахнинг “Боруссия”си учун мавсум анча яхши бошланган бўлса-да, сўнгги ўйинлар бундай ўтаётгани йўқ. Гуруҳ босқичида “Реал” ва “Интер” клублари билан жой олган немислар ўта катта куч ва чиройли ўйини эвазига “Интер”ни гуруҳда қолдириб, кейинги босқичга йўл олди. Бироқ, айни дамда уларнинг аҳволи ҳавас қиларли даражада эмас: клуб ҳаттоки келаси мавсум Чемпионлар Лигасига ҳам чиқа олмай қолиши мумкин. Сўнгги турда “Майнц”дан 1:2 ҳисобида енгилган Марко Роуз шогирдлари турнир жадвалида 8-ўринда бормоқда ҳамда кучли тўртликдан уларни 9 очко ажратиб турибди. Айни дамда уларнинг олдида турган вазифа - энг камида ЕЧЛ йўлланмасига эга чиқиш. Бу йўлда уларни жиддий синовлар кутиб турибди. Рақобат тобора кучаяётган Бундеслигада бирон натижа қайд эта олиш учун жамоа тинимсиз ҳаракат қилиши лозим. Ёки ЕЧЛни қўлга киритиш керак. Тўғри, 2-вариант эҳтимолдан анча йироқ. Бироқ ҳамма нарса майдонда ҳал бўлади, бирон нима ҳақида конкрет фикр билдириш тўғри бўлмайди. 

“Плей-офф”нинг илк босқичидаёқ уларга Пеп Гвардиоланинг тобора тўхтатиб бўлмас жамоага айланиб бораётган “Манчестер Сити”си тўқнаш келади. Албатта, қуръа пайтида ҳам кўпчилик “Сити”нинг фаворит эканлигини таъкидлади, аммо Гвардиоланинг “қовун тушириш”лари яна юз бермаслигига ҳеч ким кафолат бера олмайди. Ўтган мавсум “Лион”дан, ундан олдингиларида “Тоттенхэм”дан ва “Монако”дан кутилмаганда мағлубиятга учраганликлари ҳалигача ҳамманинг ёдида. Шу туфайли, бу ўйиндан ҳам бироз интрига кутган ҳолда мюнхенгладбахликларнинг имкониятини ўртача баҳолаймиз.

Тахминий таркиблар: Зоммер; Лайнер, Гинтер, Эльведи, Бенсебаини; Крамер, Нойхаус, Закария; Плеа, Эмболо, Хофманн.

Eu6KPsRXEAIyoMG

“Манчестер Сити”

“Шаҳарликлар”да эса ҳаммаси тобора идеал суратда кечиб бормоқда. Сўнгги турда “Арсенал”ни Стерлингнинг 2-дақиқада урган ягона голи эвазига мағлуб этган Пеп шогирдлари барча мусобақалардаги мағлубиятсиз ўйинлари сонини 18 тага етказиб олди ва бу борада ҳаммани ортда қолдирди. Шунингдек, АПЛ доирасидаги сўнгги 10 баҳсда 8 та қуруқ ўйин қайд этишди; ЕЧЛ гуруҳ босқичида 6 ўйинда атиги 1 та гол ўтказиб юборишгани ҳам ёдингизда бўлса керак. Кўпчилик футбол мутахассислари бундай даҳшатли мудофаа чизиғи билан “Сити” ниҳоят ўз тарихидаги илк ЕЧЛ кубогини қўлга киритишини тахмин қилмоқда. Бироқ бундай тахминлар ҳар йили айтилишига ҳамда якунда Гвардиола “қовун тушириши”га ўрганиб ҳам қолдик. Кузатамиз, бу сафар Пеп хатога йўл қўймай вазифани бажарармикан? Таркибда ҳимоячи Натан Акенинг йўқлигини айтмаганда, умуман йўқотиш йўқ. Оптимал таркиб, ажойиб кайфият айни дамда уларнинг ҳамроҳи. АПЛ турнир жадвалидаги катта очко фарқидаги етакчилик, Лига Кубоги финали, ЕЧЛда осонроқ рақиб… Ҳаммаси уларнинг фойдасига ишламоқда, фақат юзага келган имкониятдан унумли фойдаланиб қолиш кифоя.

Тахминий таркиблар: Эдерсон; Уокер, Стоунз, Диаш, Канселу; Родри, Бернарду Силва, Гюндоган; Фоден, Де Брюйне, Стерлинг.

Eu6m83KXMAQYTP9

Мураббийлар фикри.

Марко Роуз:

Биз бугун жасорат билан ўйнашимиз керак. Одатда, “Сити” билан бўлган ўйинларда бирон натижага эришиш учун таваккал ўйин кўрсатиш лозим. Ақл билан, шахмат партиясига асосланган ўйин кўрсатиш - менинг фикримча, Пеп жамоасига қарши камдан-кам ҳолда фойда келтиради. Улар ҳозир пик формага чиққан. Бизда эса айрим муаммолар бор. Ўйлаймизки, муаммоларни унутган ҳолда ўйнасак, бирон натижага эришишимиз мумкин”.

Eu5Vt36WgAMzJPK

Пеп Гвардиола:

Биз иложи борича яхши ўйнашга ва яхши натижа қайд этишга ҳаракат қиламиз. Мени ҳозир “Боруссия” билан бўладиган ўйинга қараганда кўпроқ “Вест Хэм” билан бўладиган ўйинимиз ўйлантирмоқда. Биз барча турнирлар учун бирдай кураш олиб борамиз. Жамоамизнинг кайфияти яхши. Бизда ҳозирча муаммолар йўқ, ўйлаймизки, кутилган натижани қайд этамиз”.

Eu9fsPjXIAEL5Nb

Хулоса ўрнида

"Манчестер Сити" бу ўйинда мутлақ фаворит. Бунга исбот сифатида шунчаки сўнгги ўйинлардаги натижаларни мисол қилиб келтиришнинг ўзи кифоя. Сўнгги 10 та ўйиннинг 10 тасида ғалаба, 8 та қуруқ ўйин - "шаҳарликлар"нинг фойдасига. 10 та баҳснинг 5 тасида ғалаба, 3 тасида дуранг ва 2 тасида мағлубият - бу "Сити"га муносиб рақобат уюштириб бериш учун етарли эмас. Лекин, нима бўлган тақдирда ҳам тезкор гол ёки сенсациялар юз бериши эҳтимолдан ҳоли эмас. Катта эҳтимол билан Гвардиола бу баҳсни ҳам ўз фойдасига ҳал қилса керак. Албатта, бу шунчаки тахмин. Барчаси 90 дақиқа ичида майдонда ҳал бўлади. Биз эса сизга мароқли томоша тилаймиз!

Абдулла Маннонов тайёрлади.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар