ЕЧЛнинг янги мавсумида Англиядан нечта жамоа иштирок этиши маълум бўлди

Англия Премьер-лигаси якунларига кўра, 2026/2027 йилги ЕЧЛ умумий босқичида Англиядан 5 та жамоа иштирок этади.

Бунга "Арсенал"нинг 1/4 финал илк учрашувида "Спортинг" устидан қозонган 1:0 ҳисобидаги ғалабаси сабаб бўлди. Ушбу натижа орқали Англия клублари УЕФА коэффициентлари жадвалида қўшимча йўлланмани қўлга киритди.

Маълумот учун, ЕЧЛ иштирокчилари сони 36 тага оширилганидан кейин, қўшимча икки йўлланма энг юқори коэффициентга эга давлатларга берилади. Айни пайтда Англия клублари 25,013 очко тўплаган. Иккинчи йўлланма учун Германия ва Испания кураш олиб бормоқда.

Ҳозирда АПЛ турни жадвалида 5-ўринни 49 очко билан "Ливерпуль" эгаллаб турибди. Ундан кейин "Челси" (48 очко), шунингдек "Брентфорд" ва "Эвертон" (46 очкодан) жой олган.