Эҳтимол, мен Қозоғистон клубларида ишларман - Жаъфар Ирисметов қозоқ матбуотига интервью берди

Икки маротаба Қозоғистон чемпионати элит дивизионининг энг яхши тўпурари бўлган ўзбекистонлик ҳужумчи Жаъфар Ирисметов, шубҳасиз, Қозоғистон футболида сезиларли из қолдирган. «Қайрат», «Олма-Ота» ва «Актобе» клублари сафида ўтказилган 5 мавсум давомида ҳужумчи умумий ҳисобда 62 та гол урган ҳолда ҳам жамоавий, ҳам индивидуал мукофотлардан иборат бой коллекция тўплашга эришган. Сўнгги йилларда ушбу ёрқин ижрочи Тошкентнинг «Пахтакор» клуби раҳбариятида меҳнат қилиб келмоқда.

Яқинда «Sports.kz» интернет портали мухбири Ирисметов билан боғланиб, ундан интервью олди.

- Жаъфар, ҳозирда қандай иш билан шуғулланяпсиз? Тушунишимча, сиз «Пахтакор»да спорт директорисиз?!

- Ҳа, мен ҳозир «Пахтакор» футбол клубининг спорт директори бўлиб ишламоқдаман - бу лавозимда учинчи йилни ўтказяпман. Аввалига бироз қийин бўлди, энди кўникиб қолдим, тажриба орттирдим.

- Сизнинг клубингиз учун ҳозирги Қозоғистон футбол бозори қанчалик қизиқарли?

- Қозоғистон чемпионати ҳақида гапирадиган бўлсам, бу шахсан мен учун қизиқ, деб айта оламан, чунки ўзим у ерда ўйнаганман. Мен ҳозиргача Григорий Бабаян ва «Қайрат»да ишлайдиган Вадим Боровский билан алоқадаман. Улар яқинда Ўзбекистонда бўлишди - учрашдик, қозоқ футболини эсладик. Ростини айтганда, соф профессионал нуқтаи назардан, қозоғистонлик футболчиларга биз камдан-кам ҳолларда қизиқиш билдирамиз. Айтайлик, менинг ишим бўйича кимнидир таклиф қилиш жуда қийин, чунки Қозоғистонда нарх-наволар қандай эканлигини яхши биламан ва бу масалада, бизга албатта хорижликлар билан ишлаш осонроқ. Бироқ биз Қозоғистонда ўйнаган чет эллик футболчиларга қизиқдик, масалан, кейинроқ мамлакатни тарк этган ўша Гоуга. «Остона» сафида хорижлик ҳужумчилар бор эди ва ўшаларга ҳам қизиқиш билдирганмиз. Бироқ бу иш бермади - уларни клубимизга жалб қила олмадик.

Қозоғистон футболи шахсан ўзимни қизиқтиради, чунки мен у ерда ўйнаганман ва «Иртиш» каби таниқли клубнинг кучли дивизионда ўйнашни тўхтатгани жуда ачинарли. Бу албатта, қозоқ футболи учун катта минус... «Қайрат»ни астойдил кузатаман, шунингдек, клубда нималар юз бераётганини. У ерда дўстларим ишлайди. Вадим Боровский билан, юқорида айтиб ўтганимдек, яқинда жуда илиқ суҳбатлашдим, ундан Қозоғистон футболи ҳақида жуда кўп нарсаларни билиб олдим. Ҳозирда «Тобол» бош мураббийи бўлган Григорий Бабаян билан жуда яқин алоқадаман. Шундай экан, Қозоғистон футболи ҳақида етарлича маълумотга эгаман. Умуман олганда, Ўзбекистонда Қозоғистон футболи ҳақдаги маълумотлар жуда кам.

- Коронавирус пандемияси ўзбек футболига қандай таъсир қилди?

- Вабо, албатта, бизнинг футболимизга сезиларли таъсир кўрсатди. Ҳамма дунё миқёсида қарайди - асосий лигада нималар бўлмоқда, лекин биз болалар футболи, академия ҳақида ҳам ўйлашимиз керак. Бизда болалар футболида жуда кўп ишлар юз бермоқда, шунинг учун энг муҳими бўшлиқ пайдо бўлмаслиги керак. Масалан, бир-икки йил ичида бизнинг олий ва биринчи лигаларимиз клубларимиз таркибларини тўлдириши керак бўлган U-18 жамоалари ҳозир ўйнамаяпти – футболдан четлашишганига 4-5 ой бўлди. Шунинг учун энди улар ҳақида кўпроқ ўйлашимиз керак ва албатта, биринчи жамоа ҳақида ҳам. Пандемия мухлисларнинг футболдан четлатилишига қаттиқ таъсир қилди – учрашувлар томошабинларсиз ўтказилмоқда. Чипталар ва мавсум абонементлар сотувидан кўп пул топадиган Европа клубларичалик бизга катта таъсир ўтказди, дея олмайман. Мени кўпроқ болалар ва ўсмирлар футболи ташвишга солмоқда. Жамоаларимиз ўйнаши керак бўлган мусобақалар бор - масалан, 16 ёшгача бўлганлар ўртасидаги Осиё чемпионати - лекин улар деярли машғулотлар ўтказишмаяпти. 

- Қозоғистонда «Қайрат», «Актобе», «Олма-Ота» учун ўйнагансиз... Ушбу клублардан қайси бири кўпроқ эсда қолди ва нимаси билан?

- Тўғрисини айтсам, барча клублар хотирамда сақланиб қолган. Аввал «Қайрат»га келдим - биз чемпионликни ютдик ва яна кумуш медални ҳам қўлга киритдик. Қозоғистонда ҳар йили нимадир ютардим, шу сабаб қозоқ футболи фаолиятимнинг энг яхши қисмига тўғри келган, деб ҳисоблайман ва буни доимо такрорлаб келаман. Ўша «Олма-Ота» билан ҳам нимадир ютганман. Ягона ёқимсиз ҳолат – бу «Актобе» сафига қўшилганим бўлган. Лекин ростини айтсам, Қозоғистонда мен қониқмаган баъзи ёқимсиз вазиятлар ҳам бўлган – худди «Актобе»да ўказган даврим сингари.

Бунақасига олиб қараганда, «Олма-Ота» сафида ўтказган даврим кўпроқ ёдимда қолган. Жамоа сафида иштиёқли ёшлар жамланганди. Биз ҳаммамиз ёш болалардек бахтли эдик (кулиб). «Қайрат» сафида ўтказган йилларим ҳам яхши бўлган, аммо у ерда энди энг яхши ўйинчилар йиғилганди ва хурсандчилик энди бошқача ҳис этиларди ва сиз мана шу ёш йигитлар - Боровский, Иля Воротников, Абзал Жумабаев, Ларин билан ғалаба қозонганингизда... Ҳаммани эслайман. Чет эллик легионерлар ҳам яхши эдилар - дарвозабон Богдан, Берко, Бойченко ... Жуда яхши жамоа йиғилганди.

- Биласизми, энди «Актобе» Қозоғистон чемпионатининг биринчи лигасига тушиб кетди. Бу ҳақда нима деб ўйлайсиз?

- «Актобе»ни ҳам кузатиб бораман. Уларнинг биринчи лигага равона бўлишгани жуда ачинарли, чунки Қозоғистонда энг яхши мухлислар ўша ерда эди. «13-сектор» - буни эслайман. «Актобе»га ҳам, «Иртиш»га ҳам ачинаман. Қолаверса, Актобе шаҳридаги стадион жуда қулай эди... Менимча, бу Қозоғистон футболи учун катта йўқотиш. Бир вақтлар улар ўзларидан жуда яхши таассурот қолдиришган.

- Бир кун келиб, Қозоғистонга футбол функционери сифатида ишлашга келишингиз мумкинми?

- Албатта, бу ҳаётда ҳамма нарса бўлиши мумкин, мен Қозоғистонда ёки бошқа бирор жойда ишламайман, деб айта олмайман. Ҳаёт шундай, ҳамма нарса бўлиши мумкин. Бундан ташқари, яқинда ПРО лицензияси учун ўқишни тугатаман - деярли тугади, фақат лицензияни олиш қолди холос. Ким билади, эҳтимол мен қозоқ клубларида ишларман. Агар улар қизиқиш билдиришса - нега энди йўқ?! Аммо ҳозирча «Пахтакор»да мени ҳамма нарса қониқтирмоқда. Мен ҳар доим бу клубда ишлашни орзу қилардим. Худо хоҳласа, бир кун келиб Қозоғистонда ишлаш насиб этиб қолар.