Экитике "Ливерпуль" футболчиси сифатида илк катта интервьюсини берди

23 ёшли француз ҳужумчиси Юго Экитике расман "Айнтрахт"дан "Ливерпуль" сафига ўтди. Футболчи клуб билан олти йиллик шартнома имзолади ва илк интервьюсини берди.

Юго, табриклаймиз! Энди сен "Ливерпуль" футболчисисан. Ҳис-туйғуларинг қандай?

"Жуда ғурурланяпман. Албатта, бу катта клуб. Мен ҳаяжондаман, ўзимни гўё боладай ҳис қиляпман. Премьер-лигада тўп суришни орзу қилардим. Энди эса "Ливерпуль" сафида ўйнайман — бу мени учун беқиёс, ажойиб туйғу. Ўйинларни сабрсизлик билан кутяпман, совринлар ютишни истайман".

Сен бу ёзда жамоага қўшилган етти футболчидан бирисан. Мухлислар реакциясидан кўриниб турибдики, бу трансферлар катта умид бағишлаяпти. Янги жамоадошлар билан бирга ўйнашни интиқлик билан кутяпсанми?

"Албатта. Бу ёзги трансфер ойнаси жамоа учун ажойиб бўлди. Таркибга кўп сифатли футболчилар қўшилди. Менимча, жамоа янада кучаяди, бунга шубҳам йўқ. Шунинг учун ҳам мухлислар хурсанд".

Виржил ван Дейк яқинда янги шартнома имзолар экан, шундай деган эди: "Бу ҳар доим "Ливерпуль" бўлган" Бу сўзлар сенга ҳам тааллуқлими?

"Ҳа, мен учун ҳам тўғри танлов айнан "Ливерпуль" эди. Бу ердаги иш услуби, одамлар ҳақида эшитганларим, атмосфера, мухлислар, стадион ва футболчиларни ривожлантириш тарзи — буларнинг барчаси мени ишонтирди. Улар аллақачон Премьер-лига чемпионлари, бу Англиядаги энг яхши жамоа ва дунёдаги энг кучли клублардан бири. Шунинг учун, бу ҳақиқатдан ҳам "Ливерпуль" эди. Мураббий билан гаплашганимдан сўнг буни янада қатъий ҳис қилдим" — дея таъриф бериб ўтди мерсесайдликларнинг янги ҳужумчиси.