Элдор Адҳамов: "Акинфеевга қарши ўйнаш ёқимли, лекин..."

Хабарингиз бор, “Андижон” клуби Анталиядаги йиғини мобайнида Москванинг номдор ЦСКА жамоасига қарши назорат беллашувида иштирок этди.

Бу учрашув андижонликлар учун жуда фойдали ва ўзлари учун керакли тажрибани олганликларига ишонса бўлади. Зеро, маҳоратли жамоага ҳар доим ўйин ўтказилавермайди.

“Андижон” клуби эса бу имкониятдан фойдаланиб қолди. “Армиячилар”га қарши “Бургутлар” дарвозасини қўриқлаган Элдор Адҳамов бир қатор саволларга жавоб берди.

- ЦСКАга қарши ўйин сизда қандай таассурот қолдирди?

- Ҳали оптимал формагача етиб боришимизга, жамоавий ўйин ва бир-бирини тушуниб ўйнашга бироз вақт бор. Албатта, мана шундай яхши даражадаги рақиблар билан учрашувларда хатоларимиз кўринади. Худо хоҳласа, шундай ўйинлар орқали биз албатта чемпионатгача оптимал формага кириб оламиз.

- Ўйин сиз кутган даражада кечдими?

- Класс томонлама бироз кучлироқ ва таркибида номдор футболчилари бор. Бир-иккита эпизодлар бўлмаганида балки ўйин дуранг билан якунланиши ҳам мумкин эди.

- Айтмоқчиманки, ЦСКА сиз ўйлагандек ўйин кўрсатдими ёки...

- Ҳа, мен кутгандек ўйнади. Ўйинида ортиқча ҳаракатлар йўқ. Фақат мақсадли тўп узатилиши бўлди. Бундан албатта ўзимиз учун керакли жиҳатларини ўрганамиз.

- ЦСКАнинг афсонавий дарвозабони Игорь Акинфеев учрашувда иштирок этди ва сиз унга қарши ўйнадингиз. Бу вазиятда ўзингизни қандай ҳис қилдингиз?

- Тўғрисини айтсам, футболни энди бошлаётган пайтларимда ва ундан аввал Акинфеев Россия терма жамоаси дарвозасини қўриқларди. Бундай дарвозабонга қарши ўйнаш ёқимли. Лекин асосий эътиборим ўйинда эди. Тезроқ ўйин тонусига кириш учун учрашув ҳақида ўйладим. Унга эса алоҳида эътибор қаратганим йўқ.  

- Тўғри, "Андижон" натижа бўйича ютқазди. Бироқ умумий жиҳатдан оладиган бўлсак, “Андижон” бу беллашувда нима ютди?

- Тажриба. Жисмоний юкламалардан кейин мана шундай ўйинлар орқали тонусга кириб борамиз. Муҳими, ҳамма ўз позициясида мустаҳкам ўйин намойиш этиб, жипслашиб борсак, янада кучли жамоа сифатида шакллана оламиз.

- Бундан олдин Жанубий Корея олимия терма жамоаси билан 0:0 ўйнади. Иккала баҳсни солиштира оласизми?

- ЦСКА тажрибалироқ. Корея тезкор бўлгани билан дарвозани олдига келганидан сўнг кўпинча ортга қайтишаётганди. Ҳужумни якунловчи ҳолат камроқ эди. ЦСКА эса мақсадли футбол ўйнади ва тажрибаси кўпроқлиги билиниб турибди.

- Сизни фаолиятингизда ЦСКА энг номдор рақиб бўлдими?

- Ҳозиргача шу.  

Шуҳратбек Жўраев.