Элдор Шомуродов: “Унинг йўқлиги терма жамоа учун катта йўқотиш”

Ўзбекистон миллий терма жамоамиз навбатдаги халқаро турнир учун йиғин ўтказмоқда. Бугунги машғулотлар олдидан Элдор Шомуродов журналистларнинг саволларига жавоб бериб ўтди. 

Машғулот жараёнлари қандай ўтмоқда?

— Машғулотларни яхши бошлаб олдик, ҳамма аъло кайфиятда. Бугун ҳамма футболчилар йиғинга келиб қўшилишди. Олдинда иккита муҳим ўйин кутиб турибди. Худо хоҳласа, ҳамма тайёр.

Жамоадошингиз Аббосбек Файзуллаевнинг йиғинга чақирилмагани сабаби ва унинг йўқлиги ўйинга қандай таъсир қилади?

— Албатта, унинг йўқлиги терма жамоа учун катта йўқотиш. Унда кичик жароҳат бор. Худо хоҳласа, яқинда у қайтади.

Элдор Шомуродов “Башакшехир” сафида охирги пайт гол урмай қўйди. Буни нима билан изоҳлайсиз?

— Ҳамма футболчида бундай ҳолат бўлиб туради деб ўйлайман. Ҳар доим ўзимиз истагандек бўлавермайди. Муҳими жамоавий натижа.

Габон ва Венесуэлага қарши ўйин терма жамоа учун қанчалик муҳим?

— Бу йиғин жаҳон чемпионатига кетиш олдидан охирги йиғинимиз. Албатта бу жуда ҳам муҳим. Бор кучимизни синаб олиш учун имкон. Бир неча футболчиларимиз жароҳатда, термага янги футболчилар келиб қўшилган. Бу улар учун ҳам яна бир тайёргарлик ва улар учун ўзларини кўрсатишга яхши имконият.

FIFA Series турнирининг ўтказилиши ЖЧга тайёргарлик кўришимиз учун қанчалик фойдали?

— Оддий ўртоқлик ўйинлари ўтказилгандан кўра, шундай кичик турнирлар ташкил этилиши қизиқишни орттиради. Шу томондан бундан ҳам футболчилар, ҳам мухлислар ютади.