Энг бақувват футболчи тренажёр залига бориши тақиқланди

Англия Премьер-лигасида қолиш учун курашаётган “Вест Хэм” жамоаси бош мураббийи Нуну Эшпириту Санту ҳужумкор футболчи Адама Траорега тренажёр залига боришни тақиқлаганини маълум қилди.

Унинг таъкидлашича,  испаниялик футболчининг ажойиб мушак массаси бор ва бу генетика билан боғлиқ. Шу сабабли унга оғирлик кўтариш шарт эмас.

Нуну Траорега тренажёр залидан узоқроқ юришни айтган. Унинг фикрича, футболчи залда профилактик машқларни бажаради, аммо оғирликлар билан ишламайди.

Мураббий жамоанинг 18 ёшли ҳимоячи Айридас Голамбекисга кўпроқ тренажёрларда машқ бажаришни маслаҳат берди. Ёш футболчи тажрибали Траоредан фарқли равишда  вазн қўшиш керак ва шунинг учун у машғулотлар жараёнида тренажёр залида кўпроқ машқ қилади.