"Энг қийини бу даянга чиқишдан олдин ўз-ўзингизга қарши курашдир, Коньяга олтин медаль учун боргандим" - Ислом бирдамлик ўйинлари совриндори Нияз Пулатов билан эксклюзив интервью

Туркиянинг Конья шаҳрида Ислом бирдамлиги ўйинлари бўлиб ўтмоқда.

Таэквондо бўйича терма жамоамиз вакили, 2017 йилги Бокуда ўтган Ислом ўйинлари чемпиони Нияз Пулатов ўз унвонини ҳимоя қилиш учун даянга чиқди. Маҳоратли спортчимиз бу сафар бронза медалини қўлга киритди. Биз Нияз билан боғланиб, унинг фикрларига қизиқдик.

Аввало медаль билан табриклайман. Ҳиссиётларингизни таърифлаб бера оласизми?

- Туйғулар аралаш. Бир томондан натижа ўтган сафаргидан бироз пастроқ бўлди. Бироқ медаль қўлга киритдим. Бу ҳам жуда қувончли. Лекин барибир биз ҳаммамиз бу ерга олтин медаль учун келгандик.

Ислом бирдамлиги ўйинлари олдидаг йиғин қандай ўтганди? Яъни, мусобақага 100 фоиз тайёрмидингиз?

- Мусобақа олдидан йиғин Дукентда бўлиб ўтди. Худога шукр, бу борада ҳеч қандай гап-сўз бўлиши мумкин эмас. Спортчилар ўзларини тўлиқ машғулотга бағишлади. Ўйлайманки, жисмонан 100 фоиз тайёр эдик, аммо ҳеч қайсимиз хатолардан холи эмасмиз. Кейинги беллашувларга қадар уларни албатта тузатиб борамиз.

Мураббийларнинг қайси кўрсатмалари кўпроқ ёрдам берди? Ҳар ҳолда, улар спортчига кўринмайдиган хатоларни сеза олади...

- Биз спортчилар учун мураббийнинг ҳар бир сўзи муҳим. Чунки даянда ҳаракат қилганимизда, ўзимизни ташқаридан кўра олмаймиз. Шу сабаб, устозларимни доим тинглашга ҳаракат қиламан. Уларнинг ҳар бир кўрсатмаси менга фақат ва фақат ёрдам беради. 

Мусобақанинг амалдаги чемпиони сифатида Туркияга келгандингиз. Бу рақиблар сизга қарши кўпроқ тайёргарлик кўришига сабаб бўлдими?

- Худди шундай! Бу ерга унвонимни ҳимоя қилиш учун келгандим. Улар эса мендан уни тортиб олиш учун... Менимча, ҳаммаси яхши якунланди. Энди менда Ислом бирдамлиги ўйинларининг олтин ва бронза медаллари бор.

Чемпионликни қўлга киритишдан кўра уни ҳимоя қилиш қийин, деган гап бор. Бунга муносабатингиз қандай?

- Бу гапга тўлиқ қўшиламан. Сабаби, барчанинг эътибори чемпионда ва ҳамма унга қараб тайёргарлик кўради. Бу сизга қийинчилик туғдиради, албатта. Буни Конья даянларидаги беллашувлар давомида яна бир марта ҳис қилдим.

Ҳеч қайси жанг осон бўлмагани аниқ. Орасидан энг кўп қийналганингиз қайси бири бўлди?

- Айнан биттасини ажратиб кўрсатмаган бўлардим. Бу рақибларга ҳам кичик ҳурматсизлик бўлиши мумкин. Умуман олганда, энг қийини бу даянга чиқишдан олдин ўз-ўзингизга қарши курашдир. Чунки ҳали баҳс бошланмасидан мияга турли хил фикрлар келади. Ана шулар устидан ғалаба қозона олсангиз, марра сизники!

Сўнгги сўз ўрнида ўзбекистонлик мухлисларга нима деган бўлардингиз?

- Барчангизга чуқур миннатдорлигимни билдирмоқчиман. Ҳаммага катта раҳмат, дўстлар! Биз бу билан тўхтаб қолмаймиз, фақат олға интиламиз.

Жавоҳир Азимов суҳбатлашди