Энг зўрлари: Мухторовдан Абдуҳолиқовгача

Суперлигада ҳар бир турнинг ўз қаҳрамонлари бор. 21-турда ҳам ана шундай футболчилар топилади. Қуйида шу хусусида сўз юритамиз.  

“Турон” – “Металлург” – 1:1. Учрашувнинг энг яхши футболчиси – Хуршид Мухторов

Суперлигада охирги ўринда бораётган “Турон” ўз уйида “Металлург”ни қабул қилди ва бу беллашувда кучлар тенг келди. Ҳолбуки, мезбонларга ғалаба сув ва ҳаводек зарур эди. “Турон” жамоаси сардори Хуршид Мухторов жамоасининг ғалабаси учун роса ҳаракат қилди. Ўйлаймизки, у шунга яраша баҳснинг энг яхши ўйинчиси бўлди.

“Бунёдкор” – “Қизилқум” – 2:2. Учрашувнинг энг яхши футболчиси – Муҳаммадали Ғиёсов

Лигада қолиш учун жиддий курашаётган “Қизилқум” бу турда Тошкентда “Бунёдкор” билан 2:2 ҳисобида дуранг ўйнади ва бир очкони қўлга киритди. Ўйинда навоийликлар ғалаба қозониб кетиши ҳам мумкин эди. Ҳисоб 1:1 бўлиб турган пайтда “Қизилқум” футболчиси Муҳаммадали Ғиёсов жамоасини яна олдинга олиб чиққанди. Бироқ 82-дақиқада ғалабани қўлдан чиқардилар. Ғиёсов эса бошқалардан фаоллиги билан ажралиб турди. Иқтидорли ўйинчи ҳақли тарзда энг яхши футболчига айланди.

ОКМК – “Сўғдиёна” – 3:2. Учрашувнинг энг яхши футболчиси – Жавоҳир Қаҳрамонов

Олмалиқда бўлиб ўтган ОКМК – “Сўғдиёна” учрашуви голларга бой ўтди ва унда мезбонлар 3:2 ҳисобида ғалаба қозонди. Қизиғи, бешта голдан тўрттаси “Сўғдиёна” футболчиларининг ҳисобига ёзилди. Бундан иккитаси автогол бўлса, яна иккитаси Жавоҳир Қаҳрамоновга тегишли бўлди. Жамоа сардори “Сўғдиёна”да Жасур Ҳасанов сингари ўз ўрнига эга бўлиб, етакчиликни қўлига оляпти. ОКМКга ҳам анча муаммолар туғдирди. Гарчи жамоаси ютқазганига қарамасдан Қаҳрамонов энг яхшиси бўлди.

“Насаф” – “Нефтчи” – 2:0. Учрашувнинг энг яхши футболчиси – Умар Эшмуродов

“Нефтчи”нинг Суперлигадаги мавсум бошидан бери давом этиб келаётган мағлубиятсиз серияси Қаршида якун топди. “Насаф” “Нефтчи”ни тўхтатишни уддалади. Албатта, бу ўзига яраша қийин кечгани рост. Рақиб бежизга ютқазмаётганди ва мезбонларга жиддий қаршилик кўрсатди. Шунга қарамай, “Насаф” сардори Умар Эшмуродов бошчилигидаги ҳимоя чизиғи жуда ишончли ўйнадилар. Эшмуродов жароҳатидан фориғ бўлгач, яна жамоасига фойда келтиришни бошлади.

“Андижон” – “Пахтакор” – 1:0. Учрашувнинг энг яхши футболчиси – Рубин Хебай

Ҳа, бунга шубҳа бўлиши мумкин эмас. Албаниялик Рубин Хебай яна трендда. У “Пахтакор” дарвозасига шунақанги гол урдики, ҳали буни кўпчилик, айниқса, “Пахтакор” дарвозабони ёдидан чиқармайди. “Андижон” тўпурари Суперлигани “ёндиряпти”.

“Бухоро” – “Навбаҳор” – 0:3. Учрашувнинг энг яхши футболчиси - Темурхўжа Абдуҳолиқов

Тажрибали ҳужумчи ниҳоят “Бухоро”га қарши ўйинда гол урди. Шунингдек, “Навбаҳор”нинг фаол футболчиларидан бири бўлди, голларда иштирок этди. Албатта, ҳужумчи сифатида унинг голлари камроқ, адашмасак чемпионатда тўртинчи голини урди. Аммо “Бухоро” билан беллашувда Абдуҳолиқов том маънода ўзини кўрсата олди ва ҳақли равишда энг яхши футболчига айланди.

Шуҳратбек Жўраев.