Эрон ФИФАга жаҳон чемпионатида қатнашиш шартини айтди

Эрон футбол федерацияси Яқин Шарқдаги можародан келиб чиқиб, 2026 йилги жаҳон чемпионатида миллий терма жамоа ўйинларини АҚШдан Мексикага кўчириш бўйича ФИФА билан музокаралар олиб бормоқда.

Бу ҳақда AFP агентлиги Мексикадаги Эрон элчихонасига таяниб хабар берди.

- АҚШ президенти Дональд Трамп Эрон миллий жамоаси хавфсизлигини кафолатлай олмаслигини очиқ айтганидан сўнг, албатта, биз Америкага бормаймиз. Ҳозирда биз ФИФА билан жаҳон чемпионатида Эрон жамоаси ўйинларини Мексикада ўтказиш бўйича музокара олиб бормоқдамиз, - деди Эрон футбол федерацияси раҳбари Меҳди Тож элчихонанинг X ижтимоий тармоғида эълон қилинган баёнотида.

Ўтган ҳафта Трамп Эрон жамоасига “ўз ҳаёти ва хавфсизлиги учун” турнирга бормасликни таъкидлаган эди. Жаҳон чемпионатининг финал босқичи 2026 йил июнь-июль ойларига режалаштирилган бўлиб, АҚШнинг 11 шаҳрида, Мексиканинг уч шаҳрида ва Канаданинг икки шаҳрида ўтказилади.

Эрон терма жамоаси Осиё саралашидан ўтиб, мундиалнинг “G” гуруҳига тушди, бу квартетда Бельгия, Миср ва Янги Зеландия ҳам бор.

Ҳозирги тақвим бўйича Эрон Лос-Анжелесда Янги Зеландия ва Бельгияга қарши ўйнайди, кейин эса Сиэтлда Мисрга қарши баҳс олиб боради. Агар жамоа турнирда иштирок эта олмаса, ФИФА ўрнига бошқа жамоани топишига тўғри келади. Эҳтимолий номзодлар сифатида Ироқ ва БАА терма жамоалари айтилмоқда.