"Эспаньол" ўйинчиси нега ерда ётган Винисиусни тепганини тушунтирди

«Эспаньол» жамоаси ярим ҳимоячиси Алекс Калатрава Мадриднинг «Реал» клубига қарши ўйин (1:2) бошида юз берган баҳсли вазият ҳақида фикр билдирди. Эслатиб ўтамиз, ўша пайтда қоида бузилганидан сўнг у ерга йиқилган ҳужумчи Винисиус Жуниор томонга оёқ кўтаргани учун танқидга учраган эди.

«Бу ўйин бошидаги илк эпизодлардан бири эди. Мен тўп учун курашдим, аммо тўп қочиб кетганини англаб, тўхташга ҳаракат қилдим. Назаримда, ҳакамлар айнан шуни кўришди ва VAR ёрдамида вазиятни шундай баҳолашди. Акс ҳолда, албатта, менга огоҳлантириш берган бўлишарди.

Аввал ҳам айтганман, бу шунчаки ўйин эпизоди эди. Менинг фикримча, унда ҳеч қандай қасд ёки рақибга зарар етказиш нияти бўлмаган. Ҳар бир футболчи ўз ўйинини ўйнайди. Бундай кескин баҳсларда, айниқса, сенга қарши юқори савиядаги футболчилар майдонга тушганини билсанг, фаол ва қаттиқ ўйнашга тўғри келади, акс ҳолда жуда қийин бўлади», — дея Калатраванинг сўзларини келтиради Mundo Deportivo нашри.