Фабрицио Романо: "Коман "Ан-Наср" футболчиси"

"Бавария" қанот ҳужумчиси Кингсли Команнинг "Ан-Наср"га трансфери яқин вақтлар ичида амалга ошади, дея хабар бермоқда Х ижтимоий тармоғида журналист Фабрицио Романо.

Манбага кўра, Саудия клуби "Бавария"нинг якуний розилигини кутмоқда. Шунингдек, Коман аллақачон Риёд клубига ўтишга розилик билдиргани айтилмоқда.

Аввалроқ, "Ан-Наср" Команга 2028 йилгача мўлжалланган шартнома ва мавсум учун 20-25 миллион евро маош таклиф қилгани ҳақида хабарлар тарқалган эди.

Франциялик ҳужумчи Германия клубида 2017 йилнинг ёзидан буён тўп суриб келмоқда. Бу даврда Коман барча турнирларда 339 та ўйинда майдонга тушиб, 72 та гол ва 71 та голли узатмани амалга оширди. Футболчининг клуб билан амалдаги меҳнат шартномаси 2027 йилнинг ёзига қадар мўлжалланган. Трансфермаркт порталида келтирилган маълумотларга кўра, футболчининг бозор нархи 30 миллион еврони ташкил этади.