Фарҳод Нуруллаев: "Екатеринбург Арена"да тўп суриш ҳаммага ҳам насиб қилавермайди. Финалда "Урал"ни ютиш учун бор имкониятни ишга соламиз"

Екатеринбургдаги халқаро турнирда "Қизилқум" Сербиянинг "ИМТ Белград" клубини 3:0 ҳисобида мағлубиятга учратганидан сўнг матбуот анжуманида "Қизилқум" катта мураббийи Фарҳод НУРУЛЛАЕВ журналистларнинг саволларига жавоб қайтарди.

- Аввало турнир ташкилотчиларига катта миннатдорчилик билдирмоқчиман. Бизни бу ерда жуда илиқ қарши олишди. Жамоамиз учун барча шароитлар муҳайё қилинди. Ўйин ҳақида гапирадиган бўлсам, бизда яқиндагина Суперлига баҳсларининг биринчи давраси якунига етди. Ушбу турнир биз учун янги ва ёш футболчиларимизни синовдан ўтказиб олиш учун яхши имконият деб ҳисоблайман. Қолаверса, иккинчи давра бошланишига қадар бир нечта футболчиларни жамоага таклиф этиб, мавсумнинг қолган қисмини яхши натижаларга эришишни мақсад қилганмиз. 

- Бугунги йирик ғалабадан кейин жамоангиз финалга йўлланмани қўлга киритди. Ҳал қилувчи баҳсдаги рақиб эса «Урал» жамоаси бўлишини биласиз...

- Ҳа, бугун мураббийлар штаби «Урал» – «Равшан» жамоалари учрашувини стадиондан кузатишга муваффақ бўлдик. Биз финал учрашувини «Екатеринбург Арена»да мезбонларга қарши ўтказамиз. Бу стадион ЖЧ-2018 мусобақасида бир нечта учрашувларга мезбонлик қилган. Бундай ареналарда тўп тепиш ҳаммага ҳам насиб этавермайди. Қолаверса, бу жамоа таркибида ушбу стадионда айнан навоийлик футболчи Остон Ўрунов ҳам тўп тепганини ҳам кўпчилик яхши билади. Шу сабаб «Урал»га қарши финал учрашувини муносиб тарзда ўтказиб, мусобақада ғолиб чиқиш учун бор имкониятни ишга соламиз.

"Ташкилотчилик юқори даражада, Ғиёсовга таклиф бўлса, буни раҳбарият ҳал қилади" - "Қизилқум" мураббийи халқаро турнир ва илк ғалаба ҳақида