Файзуллаев ва Европа: Аббосга икки хил баҳо!
Бугунги кунда Европанинг кучли бешлик чемпионатларида фақатгина икки футболчимиз – Италияда Элдор Шомуродов ва Францияда Абдуқодир Ҳусанов ўйнамоқда. Айниқса, 20 ёшли Ҳусанов “Ланс”даги ўйинлари орқали Европанинг гранд клублари назарига тушгани ўзбекистонлик мухлисларни хурсанд қиляпти.
Европага кетиш эҳтимоли катта бўлган ўйинчиларимиздан бири Аббосбек Файзуллаев ҳисобланади. Анчадан бери 21 ёшли ҳужумкор футболчининг кучли лигаларга ўтиши муҳокама қилиб келинмоқда.
Sports.uz портали Файзуллаевнинг Европага кўчиб ўтиш имкониятлари баҳоланган иккита муносабатни ўзбекистонлик футбол ишқибозлари эътиборига ҳавола қилади.
Рустам Ашурматов, “Рубин” ва Ўзбекистон миллий терма жамоаси ҳимоячиси:
Telegram каналида гуруҳимиз бор. Ҳаммамиз Аббосбек Файзуллаевни Осиёнинг энг яхши ёш футболчиси бўлгани билан табрикладик. Аббосбек бу совринга муносиб эди ва уни қўлга киритди.
Унинг Европага кетиш ҳақида фикр билдирар эканмиз, балки бунақа нарсаларни гапириш ҳали бироз эрта бўлиши мумкин. Лекин Файзуллаев ҳали яна ўсишга қодир.
Аббосбек Файзуллаев кучли лигаларда ўйнаши ва миллий терма жамоамизга ёрдам беришига умид қиламиз.
Владимир Пономарёв, ЦСКА собиқ футболчиси:
Аббосбек Файзуллаев – Россия футболи учун жуда яхши ўйинчи. Дриблинг орқали рақибларини алдаб ўта олади ва дарвозага аниқ, кучли зарба йўллашни билади. У ҳамон ЦСКАнинг энг зўр футболчиси. Чунки бизда бошқа ўйинчилар йўқ.
Иван Обляков бўшашиб қолди. Миралем Пьяничнинг темпи секин.
Файзуллаевда ҳам муаммолар кузатилиб туради. Балки бу чарчоқ билан боғлиқдир. Ўзини йўқотиб қўйди, демайман.
Футболчилар ўзига танқидий баҳо беришни билиши керак. Кўпинча, ёш ўйинчиларни катта маош бузади.
Файзуллаевнинг топ-клубга ўтиши ҳақида нима дейишим мумкин? Бошқа бирор жамоада ўйнолмайди. Бўйи паст, жисмоний кўрсаткичлари камтар. “Бавария”да ўйнаб кетолмайди. Унга Европада иш йўқ.
Эслатиб ўтамиз, Аббосбек Файзуллаев “Пахтакор” тарбияланувчиси ҳисобланади ва 2023 йилнинг августидан бери ЦСКАда ўйнаб келмоқда. Дебют мавсумида ёрқин ўйинлари туфайли Россия Премьер-лигасининг энг асосий кашфиёти бўлган легионеримизга “Бавария”, “Вильярреал” ва “Парма” каби клублардан қизиқиш бўлгани ҳақида хабарлар тарқатилган эди.
Аббосбек Файзуллаев жорий мавсумда ҳам самарали ўйнаяпти. Ҳамюртимиз Россия Премьер-лигаси ва мамлакат кубоги баҳсларида жами 19 та учрашув ўтказиб, иккита гол ва олтита ассист муаллифи бўлди.
Ҳурматли мухлислар, сиз нима деб ўйлайсиз, Аббосбек Файзуллаев Европанинг кучли клубларида ўйнашга лойиқми ёки ЦСКАда қолгани маъқулми? Фикрларингизни изоҳда қолдиринг...
Фикрлар