Файзуллаевга Азиз Ғаниевнинг устози мураббийлик қилиши кутилмоқда

ЦСКА Россия чемпионатини олтинчи ўринда якунлаганидан кейин бош мураббий Владимир Федотовнинг масаласи кўрилиши ҳақида маълумотлар чиқа бошлади.

Нуфузли манбалардан бири  championat.com сайтининг ёзишича, шу кунларда клуб раҳбарияти Владимир Федотов билан учрашув ўтказади. Ана шу суҳбатда мураббийнинг келажагига ойдинлик киритилади.

ЦСКА мутасаддилари бош мураббий истеъфога чиқариладиган бўлса, унинг ўрнини эгаллайдиган мутахассис билан келишиб қўйди.

- Москва клуби Марко Николичга аниқ таклиф билан чиқди. У билан шартнома Владимир Федотов ишдан олинган тақдирда имзоланади, - деб ёзди championat.com сайти.

Владимир Федотов “армиячилар”ни 2022 йилдан бери бошқариб келаётган эди.  Унинг яна бир йиллик шартномаси бор.

Сербиялик Марко Николич 2020-2021 йиллар давомида Москванинг “Локомотив” жамоасини бошқарган. 44 ёшли мутахассис айни пайтда Бирлашган Араб Амирликларининг “Шабаб Ал-Аҳли” жамоасида фаолият ўрсатмоқда.

Дубай жамоаси ўзбекистонлик мухлисларга яхши таниш. Бу клубда Азиз Ғаниев тўрт ярим йилдан бери тўп тепади. Энди унинг устози ЦСКАдаги легионеримиз Аббосбек Файзуллаевга мураббийлик қилиши мумкин.