Файзуллаевнинг Испаниядаги кучли клубга кетишини кутаётган селекционер яна 2-3 нафар ўзбек футбочисини нишонга олди!
ЦСКА таркибида уч карра Россия чемпиони бўлган таниқли футболчи Алан Дзагоев ҳозир “армиячилар” клубида селекционер бўлиб хизмат қилмоқда. Бу мутахассиснинг асосий вазифаси клубга иқтидорли ёш ўйинчиларни топиб келишдан иборат.
Алан Дзагоев “Спорт Экспресс” нашрига берган интервьюсида ўзбек футболи тарбияланувчилари, хусусан, москваликлар сафида иккинчи мавсумини муваффақиятли бошлаган Аббосбек Файзуллаев ҳақида ўз фикр-мулоҳазаларини ҳам билдирди.
— ЦСКА селекционерлари асосан қайси мамлакатлар футбол бозорини кузатиб келади? Қайси минтақалар кузатувда?
— Ҳамма жойни кузатамиз. Уругвайдан тортиб, Бразилиягача, Чилидан то Мексикагача. Масалан, ўзим охирги маротаба Мисрга бориб, у ердаги футболчиларни кузатдим, ўргандим. Марокашлик чарм тўп усталарига эътибор қаратдик. Жуда иқтидорли эронликлар бор. Умуман олганда, ҳар бир минтақадан жуда истеъдодли йигитларни топиш мумкин.
Ҳозир ўзбекларда жуда яхши авлод етишиб чиқмоқда. Май ойида улар 23 ёшгача бўлган футболчилар ўртасидаги Осиё кубогининг финалида Японияга қарши ўйнади. Ўша учрашувни томоша қилдим. Умуман олганда, 2-3 нафар ўзбек футболчиларининг ўйини ёқди.
— Сен ўйинчини баҳолашда фақат унинг ўйинига эътибор қаратасанми ёки бошқа қатор жиҳатларни ҳам инобатга оласанми?
— Баъзан бир футболчини кузатасан, у ҳақида хулоса тайёрлайсан, лекин бошқа ўйинчилар, ҳатто рақиб вакили эътиборингни тортади. Мен фақат профессионал сифатларига қарайман.
Агар ўйинчи ёқиб қолса, кейин у билан қандай келишиш мумкинлиги ҳақида бош қотирамиз. Ҳар ҳолда, ҳозир Европанинг кучли чемпионатларидан Россияга футболчи олиб келиш жуда катта муаммо. Лекин африкаликлар билан ҳеч қандай қийинчилик бўлмайди.
— Сен ўзбеклар ҳақида гапирдинг. Келаси ёзда Аббосбек Файзуллаев Европанинг топ-клубларидан бирига ўтиб кетса, ҳайрон бўлмайсанми?
— Йўқ, ҳайрон бўлмайман.
— Қай даражадаги клубга ўтиши мумкин?
— Ҳар ҳолда “Барселона” бўлмаса ҳам Испания чемпионатида бешинчи, олтинчи ўринда юрадиган жамоаларда ўйнай олади.
— “Реал Сосьедад”га ўхшаганми?
— Масалан шундай. Агар Аббос ҳозирги даражасида ўйнашда давом этса, бир-икки йилдан кейин уни ЦСКАда кўрмаймиз.
Эслатиб ўтамиз, “Пахтакор” тарбияланувчиси бўлган Аббосбек Файзуллаев ўтган йилнинг август ойида 500 минг евро эвазига ЦСКАга кўчиб ўтган эди. ЦСКА таркибида Россия Премьер-лигаси ва мамлакат кубоги, Ўзбекистоннинг турли терма жамоалари сафида нуфузли халқаро мусобақалардаги муваффақиятли ўйини орқали ном қозонган 20 ёшли футболчимиз Европанинг кучли лигаларида ўйнаш салоҳиятига эга экани айтилмоқда.
Аббосбек Файзуллаевнинг трансфер суммаси бир неча баравар кўтарилиб, бугунги кунда олти миллион еврони ташкил қилмоқда. Ҳамюртимиз айни пайтда Марказий Осиёнинг энг қиммат футболчиси ҳисобланади.
Фикрлар