"Файзуллаевнинг кетиши ЦСКА учун йўқотиш эмас, бу — ютуқ"

Москванинг ЦСКАси ва СССР терма жамоаси собиқ футболчиси Владимир Пономарёв Аббосбек Файзуллаевнинг жамоани тарк этаётгани ҳақида фикр билдирди.

"Файзуллаевнинг кетиши — йўқотиш эмас. Ҳатто айтардимки, бу — ютуқ. ЦСКАга ундан кўра, қизиқарлироқ футболчилар керак. Файзуллаев фақатгина, айтганларидек, шунчаки чаққон супурги, холос" — деган Пономарёвнинг сўзларини "Матч ТВ" келтирган.

Аввалроқ Ўзбекистон миллий терма жамоамиз аъзоси Туркиянинг "Истанбул Башакшехир" жамоасига сотилиши кутилётгани ҳақида хабарлар тарқалганди. Туркия президенти Режеп Эрдоғон қўллаб-қувватлайдиган ушбу клуб илгари мамлакат чемпиони бўлган, ўтган мавсумни эса бешинчи ўринда якунлаб, еврокубокларга йўлланма олган.

Сўнгги маълумотларга кўра, футболчимиз бугун ёки эртага Туркия клубида тиббий кўрикдан ўтади ва янги шартнома имзолайди.