Февзи Давлетов Нимели ҳақида: Изоҳ беришни ҳам хоҳламайман

Ўзбекистон Суперлигаси 10-туридан ўрин олган "Сурхон" - "Сўғдиёна" (1:0) беллашувидан сўнг мезбонлар бош мураббийи Февзи Давлетов ўз фикрлари билан ўртоқлашди. 

- Биринчи навбатда йигитларни ғалаба билан табриклайман. Шунингдек, мухлисларни ҳам. Яхши рақибга қарши ажойиб ўйин гувоҳи бўлдик. "Локомотив"га қарши беллашувда кўп камчиликларимиз бор эди. Шу сабабли, мазкур беллашувга яхши тайёргарлик кўрдик. Йигитлар бугун мен айтган кўрсатмаларни кўнглимдагидек бажаришди.

- Ўтган учрашувда ҳам, бугунги баҳсда ҳам камчиликлар бўлди. Мураббийлар штаби "Локомотив"га қарши ўйинни биргаликда таҳлил қилиб, биринчи зонадан иккинчи зонага ўтишда 14 та хатони кўрдик. Бугунги рақибимизнинг даражаси у қадар ёмон эмасди. Шунчаки, биз яхшироқ ҳаракат қилдик. 

- Тан оламиз, Дориев "Сўғдиёна"нинг ҳал қилувчи ўйинчиларидан ҳисобланади. Бироқ уни қўриқлаш учун алоҳида футболчи тайинламадик. Биз аввало ўзимизнинг ўйинимизни яхшироқ қуриб, ўз камчиликларимизни камайтиришга ҳаракат қилдик. Ҳеч қайси футболчига қарши кимдир персонал ҳаракат қилмади. 

- Улуғбек Ҳошимовнинг 4 та сариқ карточкаси борлиги сабабли бу беллашувни ўтказиб юборди. (Силванус Нимели бўйича маълумот ижтимоий тармоқларимизда чиқади - матбуот котиб)