ФИФА Ўзбекистон клубига трансфер тақиқини қўллайди

ПФЛ бош директори вазифасини бажарувчи Диёр Имомхўжаев телеграмдаги ўзининг саҳифасида "Шўртан" клубидаги муаммоларга тўхталди. Жамоа собиқ мураббийлар олдидаги қарздорликни бартараф қилмагани боис ФИФА томонидан огоҳлантирилганди. Бироқ муаммони ҳал қилишга берилган вақтда ҳам қарздорлик қолиб кетди. Шу боис, энди ғузорликлар қишки трансфер ойнасида футболчиларни ўз сафига қўшиб ололмайди.

- Клубнинг собиқ мураббийлари Игорь Криушенко ҳамда Виталий Варивончик "Шўртан"да қолиб кетган пулларини олиш учун бир неча йилдан буён кураш олиб боради. Бир неча кун аввал, ФИФА "Шўртан" учун сўнгги огоҳлантириш берди, бироқ иқтисодий муаммолар гирдобида бўлган жамоа қарзларни барибир бартараф эта олмади.

Эндиликда ФИФА "Шўртан" учун келаётган қишки трансфер ойнасига тақиқ қўяди. Бизда қишки трансфер 4 январь санасида очилади ҳамда 12 март кунига қадар давом этади.

Сўнгги 1 йилдан буён "Шўртан" раҳбарияти яхши ишлаяпти. Буни жамоа қайд этаётган натижаларда ҳам кўриш мумкин. Тахминан шунча вақтдан бери раҳбарият ўзимизнинг мураббийлар, футболчилар ва бошқа ишчи-ходимлар билан судлашди, кўплаб муаммолар ҳал қилинди. Бироқ хорижий мутахассислар олдидаги пуллар масаласини бугунги шароит билан ҳал этиб бўлмайди, - деди Диёр Имомхўжаев.