ФИФА раҳбари Россияга нисбатан қўйилган тақиқни бекор қилиш кераклигини айтди

ФИФА президенти Жанни Инфантино Россия жамоаларини халқаро мусобақалардан четлатиш масаласини қайта кўриб чиқиш зарурлигини билдирди.

"Албатта, биз бу масалани кўриб чиқишимиз керак. Чунки ушбу тақиқ ҳеч қандай ижобий натижа бермади. Аксинча, у кўпроқ ноумидлик ва нафратни келтириб чиқарди", — деди Инфантино.

Шунингдек, ФИФА раҳбари Россиядан бўлган қизлар ва ўғил болаларнинг Европанинг бошқа ҳудудларида футбол ўйнашига имконият яратиш муҳимлигини таъкидлади. Унинг фикрича, бу ҳолат вазиятни юмшатишга ёрдам бериши мумкин.

Маълумот учун, Россия жамоалари 2022 йил февраль ойидан бери ФИФА ва УЕФА тасарруфидаги барча халқаро турнирларда иштирок этишдан четлатилган.