ФИФА ва ОФКнинг "эркатойлари" саралашнинг 4-босқичига мезбонлик қилади

ОФК Жаҳон чемпионати саралаши 4-босқич ўйинлари Қатар ва Саудия Арабистонида ўтказилишини маълум қилди. 

Бунга ушбу босқичда иштирок этувчи бошқа терма жамоалар эътироз билдирди. Хусусан, БАА, Индонезия ва Ўмон шулар жумласидандир. Гап шундаки, сўнгги пайтларда Қатар ва Саудия Арабистони турнирлар мезбонлиги борасида анча фаол. Бундан ташқари, мазкур мамлакатларнинг ОФК ҳамда ФИФА билан муносабатлари ҳам анча яхши ҳолатда. 

Мазкур қарорга эътироз билдирган терма жамоалар ФИФА ва ОФКдан танловни шаффофлик билан амалга оширишни талаб қилган. Бироқ ОФК якунда ўз қарорини ўзгартирмади. 

Осиё минтақасида 4-саралаш босқичи ўйинлари 8-14 октябрь кунлари бўлиб ўтади. Унда жами 6 та терма жамоа (Индонезия, Ироқ, Ўмон, Қатар, Саудия Арабистони ва Бирлашган Араб Амирликлари) иштирок этади. 

Ушбу босқичда 6 та терма жамоа жами 2.5 йўлланма учун 2 гуруҳга бўлинган ҳолда, кураш олиб боради. Ўз гуруҳида биринчи ўринни қўлга киритган терма жамоалар Жаҳон чемпионатига йўлланмани қўлга киритади. 

Бундан ташқари, ўз гуруҳларида иккинчи ўринни қўлга киритган терма жамоалар ўзаро ўйин ўтказади ва мазкур учрашув ғолиби қитъалараро плей-оффга йўл олади. Хўш, қитъалараро плей-офф нима ўзи? 

Ушбу кичик "турнир" 23-31 март куни ўтказилади ва унда 6 та терма жамоа иштирок этади (КОНКАКАФдан 2 та, КОНМЕБОЛ, ОФК (Осиё), КАФ ва ОФКдан (Океания) биттадан терма жамоалар иштирок этади. ФИФА рейтинггида юқори ўринда бўлган икки терма тўғридан-тўғри финалда ўз рақибларини кутса, қолган 4 та терма жамоа ярим финалда иштирок этади. Финал баҳслари ғолиблари эса Жаҳон чемпионатига сўнгги икки йўлланмани қўлга киритади. 



 

Карим Худайқулов