ФИФА Винисиус ва Престианни воқеасидан кейин футболда янги қоида жорий этиши мумкин

Халқаро футбол федерацияси (ФИФА) "Престианни қонуни"ни жорий этиш имкониятини кўриб чиқмоқда. ФИФАнинг тегишли қўмитаси рақибни ҳақорат қилаётганда оғзини ёпган футболчиларни жазолаш масаласини муҳокама қилади. Бу ҳақда Marca хабар бермоқда.

Чемпионлар лигаси плей-офф босқичи доирасидаги "Бенфика" - "Реал" (0:1) учрашуви вақтида лиссабонликлар вингери Жанлука Престианни ва "қаймоқранглилар" ҳужумчиси Винисиус Жуниор ўртасида тўқнашув содир бўлди. Бир пайт Престианни футболка билан оғзини ёпиб, бразилиялик футболчига мурожаат қилди. Ўйиндан сўнг, Престианни Винисиусни ирқий сабабларга кўра ҳақорат қилгани ҳақида хабарлар тарқалди.