Фигу Олисе ҳақида: "У исталган дунё топ-клубида ўйнай олади"

"Реал"нинг собиқ ярим ҳимоячиси Луиш Фигу "Бавария" вингери Майкл Олисенинг ўйинидан катта таассурот олганини айтди.

Фигу айниқса унинг "Реал"га қарши Чемпионлар лигасидаги биринчи ўйинини алоҳида эътироф этди.

"У "Реал"га қарши биринчи ўйинни ажойиб ўтказди. Унинг маҳорати ақлбовар қилмас даражада. Менга у футболчи сифатида жуда ёқади.

Агар шу руҳда давом этса, доимо "Олтин тўп" учун номзодлар қаторида бўлади. Майкл ўзига хос вингер ва "Бавария" каби топ-клубда ўйнамоқда.

Унинг "Реал"да ўйнаши ҳақида айтсам, у дунёдаги исталган жамоада ўйнаш учун барча сифатларга эга — хоҳ у Мадрид бўлсин, хоҳ бошқа клуб", — деди Фигу.

Франциялик қанот футболчиси жорий мавсум Бундеслигада 27 та учрашувда 12 та гол ва 18 та голли узатма муаллифи бўлиб, жамоасининг етакчиларидан бирига айланди.