Флик: "Иккинчи бўлимда жамоа фантастик ўйнади. Биз уч очкога тўлиқ лойиқ эмас эдик"

"Барселона" бош мураббийи Ханс-Дитер Флик "Эспаньол"га қарши ютилган дерби учрашувидан (2:0) сўнг жамоа ўйинини баҳолади.

Учрашувда ҳисоб 86-дақиқага қадар очилмади, бу эса кўп жиҳатдан "кўк-анорранглилар" дарвозабони Жоан Гарсиянинг қутқарувлари билан боғлиқ бўлди. Учрашув охирида Дани Ольмо меҳмонларни олдинга олиб чиқди, ортидан эса Роберт Левандовски якуний ҳисобни ўрнатди.

"Уч очкодан мамнунман. Албатта. Ўзгартириш керак бўлган жиҳатлар бор, аммо натижадан қониқдим. Алмашинувдан кейин майдонга тушган футболчилар ўз маҳоратларини кўрсатди.

“Эспаньол” фантастик ўйин ўтказди. Ажойиб муҳитдаги дерби бўлди. Ўйин ривожига қараб, ғалабага тўлиқ лойиқ эмас эдик, аммо алмашинувлардан кейин кўрсатган даражамиз ҳал қилувчи аҳамиятга эга бўлди.

Жоан Гарсия учун хурсандман, у дунёдаги энг яхши дарвозабонлардан бири. Илк 80 дақиқадаги ўйинимиздан қониқмадим, Жоан жуда кўп сейвлар амалга оширди.

Ҳар қандай ғалаба каби, бу натижа ҳам бизга ишонч бағишлайди. Рождество танаффусидан кейин ўйнаш осон эмас эди, аммо бу ғалабадан сўнг ўзимизга ишончимиз ошди. Умид қиламанки, Испания Суперкубоги мусобақасида ҳам барчаси яхши бўлади. Машғулотларда кўраётган ишларимдан жуда мамнунман. Қийналдик, аммо уч очкони қўлга киритдик.

Дербининг аҳамиятини яхши биламан. Кўчаларда бу ўйинни кутаётган одамлар жуда кўп эди. Бу учрашувдаги ғалабанинг қанчалик муҳим эканини тушунаман. Мен бахтиёрман", — деди Флик матбуот анжуманида.

Ҳозирда "Барселона" турнир жадвалида пешқадам бўлиб турибди ва Мадриднинг "Реал"ини 7 очкога ортда қолдирмоқда.