Флорентино Перес сайловлар олдидан "Реал" аъзоларига мурожаат қилди

“Реал” президенти Флорентино Перес клуб президентлиги учун сайловлар арафасида клуб аъзоларига мурожаат қилди.

“Мен — "Реал Мадрид"ман. Бошқалар эса "Реал"ни ўзлаштириб олишни истайди, аммо охирги сўз сизники бўлади.

Клуб аъзоларига тегишли бўлиб қолиши учун аввалгидан ҳам қаттиқроқ ишлаймиз. Шунинг учун ҳеч ким ва ҳеч нарса бизга тегишли бойликни тортиб олмаслиги учун бор кучимни сарфлайман. Биз — клуб аъзолари унинг кечаги, бугуни ва эртаси эгалари бўлиб қоламиз.

Биз "Реал Мадрид"ни бугунги даражага тайёрлаш учун катта иш қилдик. "Forbes" талқинига кўра, дунёдаги энг қиммат спорт лойиҳасини яратдик. Бизни ҳатто Гарвард каби нуфузли университетларда ўрганишмоқда.

Мен 2000 йилда сайловда ғалаба қозонганман. Клуб барқарор ҳолатга келганини кўргач, кетгандим. 2009 йилда эса жамоа қадриятларини ҳимоя қилиш учун қайтишга мажбур бўлдим.

Клубнинг ҳақиқий эгалари бўлган аъзолари суверенитети ҳеч қачон шубҳа остида қолмаслиги учун қўлимдан келган барча ишни қиламан. Қанча ёлғон ўйлаб топишмасин, бизники бўлган нарсани тортиб олишолмайди.

Қўлимизда қандай бойлик борлигини барчамиз унутмайлик", — деди Перес.