"Футболчи сифатида ўсишим учун энг яхши жой - бу..." ёхуд терма жамоамиз аъзоси клубини ўзгартиргани ҳақида

“Олимпик” мавсумларалиғида таркибига Одил Абдумажидовни қўшиб олди. Истеъдодли ҳимоячи Ўзбекистон олимпия терма жамоаси аъзоси бўлиб, бош мураббий Тимур Кападзе ишонган йигитлардан бири.

Шу сабабли бу сафар мутахассис футболчини ўз жамоасида ўйнашига кўндира олди. 2022 йилни Қозоғистонда “Ордабаси” жамоасида ўтказган ҳимоячи яна ўзимизни чемпионатга қайтди.

Қолганини Одил билан қуйида уюштирган суҳбатимиз орқали бохабар бўласиз.

- “Олимпик” клубига ўтишингиз қандай содир бўлди? Бу таклифни қабул қилишда иккиланмадингизми?

- Тимур ака Кападзе билан гаплашдим. Мени клубга келишим кераклигини айтди. Камчиликлар устида ишлашимиз зарур, деб таъкидлади. Мана, насиб экан келдим.

- Ҳуқуқий томондан “Металлург” жамоасига тегишлисиз. “Олимпик” клубига ҳам ижара асосида ўтдингизми ёки трансферингизни сотиб олдими?

- Ижарага келдим. Мени футболчи бўлиб ўсишим учун жуда яхши жой – бу “Олимпик”. Ушбу таклифни “Металлург” раҳбарияти ҳам қўллаб-қувватлади.

- Олдин суҳбатлашганимизда четдан таклифлар бўлаётгани тўғрисида ҳам гапириб ўтгандингиз. “Олимпик”ни танлашингиз ўзингиз учун кутилмаган ҳолатда юз бермадими?

- Айтганимдек, Тимур ака камчиликларинг бор, шуни устида ишлашимиз керак ва кейин четга янада тайёр бўлиб борасан деб айтди. Яқин инсонларим билан бу ҳақида маслаҳатлашдим. Худо шу ерда насиб қилган экан, келдим. Ҳаммаси хайрли бўлсин.

- “Металлург” билан шартномангиз борлиги учун Бекободда қолишингиз ҳам кутилаётганди. Бу жамоада қолиш истагингиз йўқмиди, аслида?

- Шунақа десам ҳам бўлади. Ўйлашимча, “Металлург”дан кўра “Олимпик”да яхшироқ ўсишга эришаман, деб ўйладим. “Металлург” бошлиқлари билан гаплашганимда улар ўз хоҳишингга қараб иш тут дейишди. “Металлург” мени футболчи бўлишимга сабабчи бўлган жамоа ҳисобланади. Шунинг учун ҳам уларнинг маслаҳатини оламан.

- “Олимпик”ни танлашингизда яна кимлар билан маслаҳатлашдингиз?

- Албатта, ҳамма маслаҳат берди. Кўпчилик билан гаплашдим. Ҳозир айтганимдек, “Металлург” раҳбарлари ва мураббийлари билан ҳам мулоқот қилдим. Биринчи мураббийим бор ва футболчи бўлишимга сабабчи бўлган инсонларнинг гапларига қулоқ тутдим. Барибир биринчи ўринда “Олимпик” жамоасига ўтишимда катта роль ўйнагани бу Тимур ака Кападзе бўлади. Гаплашганимизда нима қилиш кераклигиин айтди. Футболчи сифатида ўсишимда янада яхши бўлиши учун шу вариантни танладим. Хайрли бўлсин!

- Легионерга айланиш имкониятидан фойдаланмаганингиз учун ўзингизда бироз бўлса ҳам хафагарчилик аломатлари кузатилмадими?

- Йўқ, бошида иккиландим. Лекин маслаҳатлашганимдан кейин ҳаммаси жойида бўлди. У ерда бўлсам ҳам, бу ерда бўлсам ҳам мақсад битта. Худога таваккал қилиб ҳаракат қиляпман. Янада кучли чемпионатларга кетиш ниятим бор.

- “Олимпик” Ўзбекистон олимпия терма жамоасининг негизини ташкил қилади ва бу борадаги вазифа ҳаммага яхши тушунарли. Аммо бундан ташқари, клубнинг яна бошқа мақсади ҳам борми?

- Биринчи ўринда олдимизда турган вазифа Олимпиада мусобақага чиқиш. Совринларни қўлга киритиш ва жамоани чемпионликка етаклаш мақсадимиз бор. “Олимпик” шу сабабли ташкил топган.

- Ўтган йили “Ордабаси”да тўп сурдингиз. У ерда бир йил ўйнаб ўзимизни чемпионатга қандай футболчи сифатида қайтдим, деб ўйлайсиз?

- Қанақа ўйинчи бўлиб қайтдим, билмайман. Аммо ўзим учун ўсишга эришдим. “Олимпик”да янада ўсишни хоҳлайман. “Ордабаси”дан кетишим албатта қийинроқ бўлди. Чунки бу жамоага анча ўрганиб қолгандим. Клуб билан бир оила бўлиб қолгандик. Қаерда бўлсам ҳам мақсадим ўзгармаган.

Шуҳратбек Жўраев.