Футболчини ҳақорат қилган ногирон мухлис жазоланди

"Ливерпуль"-"Борнмут" учрашувида меҳмонлар футболчисини ҳақорат қилган мухлис Британия стадионларига кириши тақиқланди.

"Борнмут" клуби аъзоси Антони Семеньо АПЛ 1-туридан ўрин олган "Ливерпуль"га (2:4) қарши ўйинда ирқий ҳақоратларга учради, ҳакам 29-дақиқада ўйинни тўхтатди. Хабар қилинишича, буни "қизиллар"нинг ногиронлар аравачасидаги 47 ёшли мухлиси амалга оширган, у "Энфилд"дан ҳайдалган. 16 август куни полиция мухлисни ҳибсга олди.

Мерсисайд полициясининг маълум қилишича, шанба куни ирқий сабабларга кўра жамоат тартибини бузганликда гумонланиб қўлга олинган Ливерпуль фуқароси гаров эвазига озодликка чиқарилган.

Эркакка Буюк Британиянинг барча футбол стадионларига кириш ман этилган. Ўйинлар ўтказилиши мумкин бўлган ҳар қандай аренага бир милдан (1609 метр) яқинлашиш тақиқланди.

Ҳодиса юзасидан тергов давом этмоқда, полиция "Ливерпуль" билан яқиндан ҳамкорлик қилмоқда.