Футболчининг мундиалдаги оғир жароҳати манчестерликлар трансферига таъсир қилади

“Манчестер Юнайтед” ва Уругвай терма жамоаси ярим ҳимоячиси Мануэль Угарте жаҳон чемпионати гуруҳ босқичининг сўнгги турида Испанияга қарши ўйинда (0:1) тиззасидан жиддий жароҳат олди. Бу ҳақда The Sun хабар берди.

Манбага кўра, клуб ҳозир футболчининг тиббий кўрик натижаларини хавотир билан кутмоқда. Агар тизза боғламидаги узилгани тасдиқланса, Угарте узоқ муддат майдондан четда қолиши мумкин.

Жароҳатдан олдин у ёзги трансфер ойнасида жамоани тарк этиши мумкин бўлган футболчилардан бири сифатида қаралаётган эди.

Хабарларга кўра, унга А Серия клублари қизиқиш билдирган, “Манчестер Юнайтед” эса унинг трансферидан тушадиган маблағни ярим ҳимоя чизиғини кучайтиришга сарфлашни режалаштирган.

Манкунианлар аллақачон “Аталанта” ярим ҳимоячиси Эдерсон билан келишувга эришган ва “Вест Хэм” футболчиси Матеус Фернандеш трансфери устида ҳам иш олиб бормоқда.

Қўшимча муаммо сифатида Угартенинг юқори маоши ҳам қайд этилмоқда. АПЛнинг молиявий барқарорлик қоидаларига кўра зарар кўрмаслик учун клуб уни камида 29,4 миллион еврога сотиши лозим.