"Футболимизда қанақа соврин бўлса, ҳаммасини ютмоқчимиз". Ҳамиджон Актамов нега бош мураббийликдан кетганига ойдинлик киритди

“Қизилқум” клуби ҳам янги мавсумга астойдил тайёрланди. Жамоада эътиборли ўзгаришлар кузатилди.

Биринчи навбатда айтиш керакки, бош мураббий янгиланди. Ҳамиджон Актамов клуб бош директори лавозимига ўтди. Сербиялик Никола Лазаревич эса бош мураббий сифатида ишга киришди.

Таркибга ҳам қандай футболчилар келганидан хабарингиз бўлса керак. Sports.uz мухбири мавсум бошланиши олдидан клубнинг янги бош директори Ҳамиджон Актамовга бир қатор саволлар билан мурожаат қилди.

- “Қизилқум” клуби бош директори сифатида ишга киришдингиз. Энди раҳбар сифатида айтинг-чи, жамоанинг мавсумга тайёргарлигидан қанчалик қониқиш ҳосил қилдингиз?

- Нима дейишим мумкин? Биз яхши тайёргарлик кўряпмиз. Жамоамиз Анталиядаги йиғиндан қайтиб келган. Илк ўйинга тайёргарлик кўряпмиз. Стартни уч очко билан бошлашимиз керак. Барча футболчиларимиз тайёр, кайфиятлари ҳам яхши. Худо хоҳласа, яхши ният билан бошлаймиз. Академия қуриш, реконструкция қилиш бўйича лойиҳалар бошланди. Вилоят раҳбарлари бу борада жиддий бош қотиришяпти. Худо хоҳласа, бу Навоийга катта янгилик бўлади. Яқин кунларда базамиз, академиямизга биринчи ғишт қўйилади. Маблағлар тўлиқ келишиб олинган. Янги автобус беришди. Туркиядаги йиғин ҳам кўнгилдагидек ўтди. Хориж йиғинимиз 21 кун давом этди. Чунки ўзимизда ҳали ҳам бунақа шароит йўқ. Ҳар доим майдон масаласида қийналиб келардик. Таркибга эса легионерларни чақирдик. Ўзбекистоннинг яхши футболчилари билан келишувга эришдик.

- Бунгача “Қизилқум”да бош мураббий бўлиб ишладингиз. Бу йил эса клуб директорига айландингиз. Нимага бош мураббийликдан кетдингиз? Нега клуб директорига ўтдингиз? Булар биз учун қизиқ эди...

- Сабаби мураббийликдан озгина дам олмоқчи бўлдим. Илгари бош менежер бўлган пайтимда ҳам мураббийликни ўзим бажарганман. Ҳаммаси ўзимда бўлган. Энди бошқа мураббий олиб келдик, унга ишонч билдирдик. Вилоятимиз шаънини ҳимоя қилиш учун курашамиз. Биргалашиб яхши натижа кўрсатишга ҳаракат қиламиз.

- Олдинги йиллардагидек натижага яна сиз жавоб бераверасизми ёки ҳаммаси бош мураббийга юклатилдими?

- Натижага барибир биринчи ўринда бош мураббийдан сўралади. Бундан кейин биз битта одамдан натижани сўрамасликни ўрганишимиз керак. Натижага клубнинг ҳар бир ходими, футболчиси ва мураббийи жавоб беради. Ҳамма жамоа учун ишлаши ва қўллаб-қувватлаши керак. Худо хоҳласа, бу йил натижамиз яхши бўлади деб ўйлайман.

- Нима учун бош мураббийлик учун Никола Лазаревич номзодига тўхталинди?

- Барибир хорижлик мураббий олиб келишимиз керак эди. Европа футболини кўрган, ўзимизникиларга билмаган нарсаларини ўргатиш учун жалб қилинди. Раҳбарлар мураббийни танлади. Олдин қаерда ишлаган, қандай натижалар кўрсатган, барчаси инобатга олинган. Ҳозир ҳеч нима дея олмаймиз. Ҳаммасини вақт кўрсатади. Барчамиз мураббийга ишоняпмиз.

- Клуб олдига “конкрет” қандай вазифа қўйилди?

- Футболимизда қанақа соврин бўлса, ҳаммасини ютиш вазифаси қўйилган. Максимал даражада курашамиз. Чемпионликни ҳам, Кубокни ҳам қўлга киритишга ҳаракат қиламиз.

- Ҳозирги ҳолатдан келиб чиқиб, “Қизилқум”ни бунга қодир, деб ўйлайсизми?

- Тўғриси, футболимиз ичидаги мутахассисилар бу йилги йиғилган таркибимизни юқори баҳолашяпти. Ҳамма яхши ўйинчилар тўпланган. Биз ҳамма нарсани тайёр қилиб бердик. Бу ёғи ҳаракат. Ҳаракатда эса баракат. Барибир футболчиларга кўп нарса боғлиқ.

- “Қизилқум” қачон ўз майдонига қайтади? Унгача клуб Тошкент, Олмалиқда ўйнаб туради. Мухлисларисиз ўйнаш жамоага қўшимча ноқулайлик туғдирмасмикин?

- Ҳар доим бир нарсага эришиш учун бир нарсадан кечиш керак. Бу ҳаёт қонуни. Агар ўз майдонимизда ўйнаймиз деб манфаатимизни кўзласак, инфраструктурамизга таъсир қилиши мумкин. Биз ҳозир шунга мажбурмиз. Аммо яқин йиллар ичида энг зўр майдонга ва академияга эга бўламиз. Қийинчилик бўлади. Ахир қийинчиликсиз ҳеч нима бўлмайди. Ана шу қийинчиликни бўйнимизга олишга ва меҳнат қилишга мажбурмиз.

- Қишки трансфер ойнаси вақтида қайси клубларнинг селекцияси сизни кўпроқ эътиборингизни тортди?

- Ҳеч қанақа селекция эътиборимни тортгани йўқ. Ҳаммасида бўлмаса ҳам кўплаб клубларда вазият бир ҳил. 5 та тургача ҳеч нарса деб бўлмайди.

- Таркиб масаласида режадаги барча ўйинчилар олиндими ёки...

- Таркибимизни оптимал деб ўйлайман. Нимани ният қилган бўлсак, ҳаммасига эришдик. Жамоанинг ўзагини сақлаб қолганмиз, бу ҳам катта ютуқ.