"G‘alaba qozonsak ham qo‘rquv bor, u asosiy tarkib futbolchisi ekani muhokama qilinmaydi, "Andijon" uchun xursandman" - Sergey Lushchan

Superligada 19-tur o‘yinlari davom ettirildi. "Navbahor" jamoasi bu turda safarda "Lokomotiv"ga qarshi bahs olib bordi. Komiljon Tojiddinovning yagona goli evaziga 3 ochkoga erishdi. Bellashuvdan so‘ng jamoa bosh murabbiyi Sergey Lushchan matbuot anjumanida ishtirok etdi.

- Og‘ir o‘yin bo‘ldi. Ochiqchasiga aytsam, bugun hujum chizig‘ida hech narsa o‘xshamadi. Bunga, etarlicha sabablarimiz bor. Biz liderlarimizga dam olish imkonini berdik. Yangi bog‘lamlarni sinab ko‘rdik. Biz yagona vaziyatdan gol urdik, raqib esa vaziyatidan foydalana olmadi. Menimcha, bu bahs birinchi golga qadar edi. Ha, xavotirli narsalar bor. Ayniqsa, hujum uyushtirishda. G‘alaba qozongan bo‘lsak ham, qo‘rquv bor. Bilmadim, har bir futbolchi o‘zicha nimadir o‘ylab topishga intilmoqda. Balki, bu tarkibdagi yangi futbolchilar bilan bog‘liqdir. O‘yin masalasida ko‘proq narsa kutgan edim, shogirdlarimdan. Maydon juda og‘ir edi. Raqib ham, biz ham oyoqda turishga qiynaldik. Oyoq kiyimni to‘g‘ri tanlagan bo‘lsak ham, muammo yuzaga keldi. Bellashuvni qayta ko‘rib tahlil qilamiz. G‘alaba qozonganimiz, yigitlarning mehnat qilgani uchun tashakkur. Hammma borini tashlab chiqib ketdi, maydonga. Biz futbolchilardan bir-birini yaxshi tushunishini istaymiz. Afsuski, hujumda hech narsa o‘xshamadi. 

- Bugun klass evaziga yutdik deb hisoblaysizmi? 

- Bizda bir imkoniyat bo‘ldi va undan foydalandik. Raqib ilk daqiqalardayoq 5 metrdan darvozamizni ishg‘ol qila olmadi. Bugun Suyunov bizni qo‘llab-quvvatlab yubordi. Natijadan qoniqdim, ammo o‘yindan ko‘proq narsa kutgan edik. Albatta, ruhan bosim katta. Ayniqsa, boy berilgan bellashuvdan keyin ikki hissa bosim oshib ketdi. Biz o‘tgan safar durangga loyiq o‘ynab yutqazgan edik, bugun taqdir bizga yordam berdi. 

- Sardor Rashidov va Odil Hamrobekovning holati qanday?

- Juda ham istaymiz finalga qadar tiklanishini. Balki, maydonda ko‘rinish berar. U bir o‘zi o‘yin taqdirini hal qila oladigan darajadagi ijrochi. Hamrobekovda biroz charchoq bor. U deyarli barcha o‘yinda almashtirilmasdan to‘p surmoqda. Biz unga dam olish uchun imkon yaratdik. "So‘g‘diyona" bilan bahsdan oldin yana bir ko‘rib chiqamiz. U asosiy tarkib futbolchisi ekanligi muhokama ham qilinmaydi. Shuningdek, Sayfiev ham bizga yordam bera oladi, deb umid qilamiz. Kubok finaliga to‘liq tarkib bilan boramiz. 

- Finaldan oldin yashirgan narsangiz bormi? 

- Bor narsamiz maydonda. Ruhan yigitlar charchagani rost. Buni ko‘rib turibmiz. Ayrimlar deyarli almashtirishsiz to‘p surmoqda. Xozircha bu yordam bermayapti. Biz nimanidir berkitadigan darajada iqtidorli emasmiz. Hammasi ko‘zga tashlanib turibdi. Umid qilamanki, nima bo‘lganda ham Kubokka ortiqcha tayyyorgarlikning keragi yo‘q. Hamma yigitlar buni tushunib turibdi. Xotirjamlik hech qachon yaxshi natijaga olib kelmasligini tajriba ko‘p bor ta’kidlagan. 

- "Navbahor" finalda g‘alaba qozonsa qanday mukofot oladi? 

- Boing-747 samolyotlari taqdim etiladi (kuladi). Albatta, Andijonda zavod bor va ularga mashina sovg‘a qilinishi tabiiy. Bizda, shartnoma bor. Ularning har birida chempionlik yoki Kubokdagi zafar quchgani uchun beriladigan sovg‘a yozilgan. Kamida, xafa qilishmaydi. Menimcha, har bir futbolchi uchun Kubokdagi g‘alaba moliyaviy sovg‘alardan ko‘ra qadrliroq. Pul qachondir tugaydi, ammo O‘zbekiston Kubogi g‘olibi unvoni abadiy qoladi. Andijon uchun xursandman.