Gazizov O‘runov haqida tezkor xabar aytdi
Rossiya matbuotida premer-liganing navbatdagi turida “Spartak” va “Ufa” o‘rtasida bo‘ladigan o‘yin keng muhokama qilinmoqda. Xususan, bu jamoalarni yozda yuz bergan transferlar o‘zaro bog‘lab turgani uchun qiziqish yuqori bo‘lmoqda.
Ma’lumki, o‘tgan yillar davomida “Ufa”da bosh direktor lavozimida muvaffaqiyatli ishlab kelgan Shamil Gazizov yozda “Spartak”da xuddi shu ishga taklif qilingan edi.
Bu mutaxassis o‘zi bilan klubga Oston O‘runovni olib keldi. Aslida Toshkentning “Lokomotiv” jamoasida o‘ynab yurgan Ostonning legionerga aylanishida ham Gazizovning hissasi katta. Aynan shu mutaxassis hamyurtimizni Rossiya premer-ligasiga olib kirgan.
Buyog‘iga esa nima bo‘lgani hammaga ma’lum. “Spartak” rahbariyatiga Shamil Gazizov amalga oshirgan transferlar yoqmadi va yarim yilga etmasdan bosh direktor iste’foga chiqarildi.
Katta umidlar bilan “Spartak”ga yo‘l olgan Oston O‘runov ham moskvaliklar tarkibida “Ufa”da namoyish qilgan kreativ o‘yinini ko‘rsata olmadi. Qolaversa, unga etarlicha vaqt berilmadi va asosan o‘yinning so‘nggi daqiqalarida zaxiradan maydonga tushdi.
Xullas, qishki transferlar vaqtida har ikki qahramonimiz hammasini yangidan boshlash uchun “Ufa”ga qaytdi. Oston darrov asosiy tarkib o‘yinchisiga aylandi, Gazizov esa jamoani premer-ligada olib qolish uchun ish boshladi.
Ko‘pchilikni “Spartak” – “Ufa” o‘yinida Oston O‘runovning ishtirok etishi qiziqtirayotgan edi. Avvaliga, Shamil Gazizov futbolchining ijara shartnomasida uning “spartakchilar”ga qarshi maydonga tushishini taqiqlovchi band yo‘qligi aytdi. Rossiyalik futbol mutaxassis Yuriy Belaus bu uchrashuvda O‘runovning o‘yinini kuzatish uchun O‘zbekiston milliy terma jamoasi bosh murabbiyi Vadim Abramov Moskvaga tashrif buyurishini ma’lum qildi.
Biroq, keyinchalik Oston O‘runov Rossiya kubogi doirasida “Axmat” klubiga qarshi bellashuvda jarohat olgani bois, “Spartak” bilan bo‘ladigan bahsga tayyor emasligi va 18 apreldagi uchrashuvda qatnashmasligi haqida xabarlar tarqatildi.
Shunga qaramay, “Ufa” bosh direktori Shamil Gazizov bu ma’lumotlarni inkor etmoqda.
- Oston O‘runovning “Spartak” bilan bo‘ladigan o‘yindagi ishtiroki borasida bir to‘xtamga kelingani yo‘q. Futbolchining o‘zi mashg‘ulotlarda qatnashmoqda. Qolganini bosh murabbiy hal qiladi. Hali yakuniy qarorga kelganimiz yo‘q, - dedi Shamil Gazizov.
Ta’kidlash joizki, “Ufa”ni “Spartak” bilan bo‘ladigan uchrashuvga yangi bosh murabbiy Aleksey Stukalov tayyorlagan.
- “Spartak” bilan to‘qnashuvda asosiy vazifamiz o‘yinni to‘g‘ri tashkil qilish. Hamma narsani ochib tashlamoqchi emasman, lekin bizda yaxshi o‘yinchilar bor. Oston O‘runov “Axmat” bilan bo‘lgan bahsda jarohat oldi. Uning salohiyatini shaxsan tekshirishga ulgurganim yo‘q. Lekin Ostonning shu paytgacha ko‘rsatgan o‘yini uning mahoratli va sifatli futbolchi ekanidan dalolat bermoqda, - dedi bosh murabbiy Aleksey Stukalov.
Oston O‘runov joriy mavsumda “Spartak” va “Ufa” jamoalari tarkibida barcha turnirlarda jami 16 ta uchrashuv o‘tkazib, bitta gol urdi va bitta golli pas uzatdi. “Spartak” – “Ufa” uchrashuvi 18 aprel kuni Moskva shahrida o‘tkaziladi. O‘yin Toshkent vaqti bilan 21:00 da boshlanadi.
Fikrlar