Гол урган Шомуродов ҳақида қизиқ факт ва Моуриньо ўйиндан кейин нималар деди?

Ниҳоят, Элдор Шомуродов яна бир карра гол ура олишини исботлади. Юзинчи маротаба ташкил этилган Италия кубогидаги юришини нимчорак финалдан бошлаган Рим клуби дастлабки учрашувини аввалги босқичларда кетма-кет иккита жамоани мусобақадан чиқариб юборган “Лечче” билан куч синашди.

“Олимпико”даги ўйин шундоқ ҳам мухлису мутахассислар танқиди остида қолаётган “Рома” учун ўта омадсиз бошланди. Учрашувнинг 14-дақиқасида меҳмонлар вакили Артуро Калабрези бош билан аниқ зарба йўллаб, Руй Патрисиу дарвозасини ишғол қилди.

Римликлар танаффусга яқин ҳисобдаги фарқни йўққа чиқарди.  Мезбонларнинг энг қимматбаҳо футболчи Тэмми Абрахам узатган тўпни рақиб дарвозасига аниқ жойлаган Мараш Кумбулла Жозе Моуриньонинг танаффусга хотиржам чиқишини таъминлади.

Иккинчи бўлимда, яъни 54-дақиқада Абрахамнинг ўзи шу куни римликлар сафида 100 ўйинини ўтказаётган Генрих Мхитяраннинг аниқ тўп узатишидан фойдаланиб, жамоасини ҳисобда олиб чиқди. Голдан ўн дақиқа ўтиб, майдонга Элдор Шомуродов тушди.

Ҳамюртимиз 81-дақиқада ўйин тақдирини ҳал қилди. Генрих Мхитарян майдон марказида тўпни Элдорга етказиб берди. Катта масофани тезкорликда босиб ўтган легионеримиз рақиб ҳимоячисини доғда қолдириб, ғолиблик масаласини ҳал қилган аниқ зарбани йўллади – 3:1.

Учрашувдан сўнг статистика билан шуғулланадиган мутахассислар Шомуродовга оид қизиқарли фактни эълон қилди.

Ўзбек ҳужумчиси Италия майдонларидаги голларининг 83 фоизини, яъни 12 та голдан 10 тасини иккинчи бўлимда киритган. Маълумки, Шомуродов “Женоа” сафида саккизта гол урган бўлса, “Рома” ҳужумчиси сифатида тўртинчи голини нишонлади.

Генуя клубидаги голларини фақат А Серияда урган ҳамюртимиз “Рома” сафида миллий чемпионатда иккита, Конференциялар лигаси ва Италия кубогида биттадан тўп киритди. Шу тариқа Элдор Италияда ўзи иштирок этган барча турнирларда ўз номига гол ёздириб қўйди.

Чорак финал йўлланмасини нақд қилган “Рома” клуби кейинги босқичда жиддий рақиб – Италиянинг амалдаги чемпиони “Интер”га қарши тўп тепади.

Италия кубогининг чорак финалидаги жуфтликлар қуйидагича кўриниш олган:

“Ювентус” — “Сассуоло”

“Аталанта” — “Фиорентина”

“Милан” — “Лацио”

“Интер” — “Рома”

Учрашувлар 9 февралга белгиланган ва битта ўйиндан иборат бўлади. Италия кубогининг амалдаги соҳиби “Ювентус” ҳисобланади.

“Рома” бош мураббийи Жозе Моуриньо учрашувдан кейин Mediaset  нашрига қуйидаги фикрларни билдирди.

- Жамоамизнинг камчиликлари бор ва биз уларни яхши биламиз. Олдинда қилинадиган иш кўп. Олдимизда бир неча ўйин ва қисқа танаффус ҳам бор. Мен кейинги рақибимиз “Интер” лигада ва Италия кубоги мусобақасида энг кучли рақиб эканига заррача ҳам шубҳа қилмайман. Демак, олдинда жуда қийн тўқнашув бор ва биз “Интер”ни майдонига ҳаммани ҳайратга солиш учун борамиз.

Футбол нуқтаи назаридан 4-8-ўринлар орасида курашиш мен истаган ҳолат эмас. Режамиз ва лойиҳамизнинг мақсади бошқа. Албатта, кейинги мавсумимиз бунисидан яхши бўлади.

“Лечче”га қарши биринчи бўлимда ҳафсалам пир бўлганини яширмайман. Техник жиҳатдан расво ўйнадик. Ҳозир эса ўзимни бахтиёр ҳис қиляпман. Мен “Рома”да уч йил ишлашга сўз берганман ва бу лойиҳани бошқасига алмаштирмайман. Энди “Интер”га қарши ўйинда жиддий тайёргарлик кўришим керак, менга кўп нарса боғлиқ бўлади, - деди Жозе Моуриньо.

“Реал” икки футболчисини "Рома"га бермади

Шомуродов Роналду ва Серхио Рамос қаторига қўшилди!