Gollar besamar ketmaydi: Fayzullaevni mashhur klub olmoqchi!

Keyingi yillarda o‘zbek futboliga oid eng ko‘p muhokama qilinayotgan mavzulardan biri Abbosbek Fayzullaevning Evropaning kuchli ligalaridan biriga o‘tishi bo‘lib turibdi.

Hujumkor futbolchimiz 2023 yilning avgustida “Paxtakor”dan TsSKAga ko‘chib o‘tganidan beri Rossiya futbolida muhim figuralardan biriga aylana oldi. Keyinchalik legionerimizga “Parma”, “Real Sosedad”, “Monako”, “Bavariya” kabi klublar qiziqish bildirayotgani haqidagi xabarlar tarqatila boshladi.

2025 yilning yozgi transferlari oldidan bu mavzu yana ko‘tarila boshladi. Bir necha manbalar 21 yoshli hujumkor futbolchiga Turkiyaning eng mashhur klubi “Galatasaroy” jiddiy qiziqish bildirayotgani haqida ma’lumotlar chiqarilyapti.

Xususan, Markaj News kanali bu haqda quyidagicha ma’lumot chiqardi.

- TsSKA klubining hujumkor futbolchisi Abbosbek Fayzullaevga Turkiya superligasining grand klubi “Galatasaroy” jiddiy qiziqish bildirmoqda.

21 yoshli o‘yinchi joriy mavsumda TsSKA klubi safida ham, O‘zbekiston milliy terma jamoasida ham muhim rol o‘ynayapti.

2024 yil dekabrda Abbos Osiyoda “Yilning eng yaxshi yosh futbolchisi”, sovriniga loyiq topildi.

Joriy mavsum Rossiya premer-ligasida 19 ta o‘yinda 2 ta gol va 3 ta golli uzatma qayd etdi. Uning TsSKA bilan tuzilgan shartnomasi 2026 yil iyun oyida yakunlanadi.

Bu ma’lumotlarni vaziyatga yaqin manba tasdiqladi, - deb yozmoqda Markaj News kanali.

Ta’kidlash joizki, Turkiya Superligasi klublari keyingi yillarda Evropaning mashhur o‘yinchilari va murabbiylarini jalb etish orqali o‘z chempionatlari saviyasini ancha ko‘tarib olishga muvaffaq bo‘ldi.

Xususan, “Galatasaroy”ning o‘zi joriy mavsumda chempionlikka asosiy da’vogar bo‘lib turibdi. Istanbulliklar safida urugvaylik darvozabon Fernando Muslera, hujumchilardan argentinalik Mauro Ikardi, belgiyalik Dris Mertens, nigeriyalik Viktor Osimxen hamda ispaniyalik Alvaro Morata  singari jahon futboli yulduzlari bor.

Evropa klublarining Abbosbek Fayzullaevga yana qiziqish bildira boshlayotgani bejiz emas, albatta. Iste’dodli futbolchimiz 2026 yilgi jahon chempionatiga yo‘llanma olishga yaqin turgan O‘zbekiston milliy terma jamoasining etakchilaridan biriga aylandi.

Fayzullaev jahon chempionati mintaqaviy saralash turnirida Qatarga ikkita, Shimoliy Koreya va Eronga bittadan gol urib, terma jamoamizning bu musobaqadagi eng yaxshi to‘purari bo‘lib turibdi.

Abbos umumiy hisobda xalqaro miqyosdagi uchrashuvlarda 25 marotaba maydonga tushib, o‘z hisobiga sakkizta gol va ikkita assist yozdirib qo‘ygan. 21 yoshli legionerimizning aynan terma jamoa safidagi muhim uchrashuvlarni ham yuqori saviyada o‘tkazayotgan xorij klublarining e’tiborini tortmoqda.

Husanovni qanday qilib qo‘ldan chiqarish mumkin?!

Bosh murabbiyning fikri o‘zbek va qozoq muxlislarini jumbushga keltirdi!