Голли имкониятлар ва ўйиндаги устунлик ҳам ғалабага етарли бўлмади ёхуд "Бобур арена"да кучлар тенг келди

Ўзбекистон Кубоги “B” гуруҳининг сўнгги – 3-турида “Андижон” жамоамиз ўз уйида Самарқанднинг “Динамо”сини қабул қилди.

Вадим Абрамов шогирдлари дастлабки иккита турда ғалабаларга эришишгани боис кейинги босқич масаласини ҳал қилишганди. Шу сабабли “Андижон”га қарши учрашувда рақиб таркибида ротациялар амалга оширилди ва ҳаттоки, бош мураббий ҳам беллашувда иштирок этмади. Ўйиндан кейинги матбуот анжуманида “Динамо”да ёрдамчи мураббий сифатида ишлаётган Марат Мифтахутдинов Вадим Карленовични бетоблиги боис кела олмагани билан изоҳлади.

Ўйин яхши бошланди. Дастлабки 10 дақиқа якунланмасиданоқ “Бургутлар”нинг жиддий ҳужумларидан бири гол билан якунланди. Фарҳод Соҳибжоновга нисбатан ишлатилган қўполликдан кейин бош ҳакам пенальти белгилади ва бу вазифани Дониёр Абдуманнопов бехато бажарди. Бўлимга қўшиб берилган дақиқада эса самарқандлик футболчилар стандарт вазиятдан сўнг ҳисобни тенглаштирдилар.

Иккинчи бўлимда “Андижон” ҳужумкорликни янада оширди. Рақиб дарвозаси олдида кетма-кет голли имкониятларни яратдилар. Фақат гол етишмади. Гоҳида дарвозабон яхши ўйнади, гоҳида зарбага аниқлик етишмади. “Бургутлар” ғалаба қозониш истагида фақат ҳужумкор ўйин кўрсатдилар. Шунга қарамай, якунда 1:1 ҳисоби ўзгармасдан қолди. Ҳар қандай ҳолатда ҳам андижонлик фанатлар жамоани қўллаб-қувватлаб, уларга ишонишда давом этишларини яна бир бор исботладилар.

Тўғри, шу билан “Андижон”нинг Ўзбекистон Кубогидаги иштироки ниҳоясига етди. Асосий эътибор чемпионат ўйинларига қаратилади. Эндиликда "Андижон" жамоасида янги саҳифа очилади. Бош мураббий сифатида ўзбек футбол афсоналаридан бири Максим Шацких бош мураббий сифатида эълон қилинди. Унга Виталий Шпанюк яқиндан ёрдам беради. Шацких 14 май санасидан жамоани қабул қилиб олади ва дебютини 17 май куни Суперлиганинг 10-тури доирасида сафарда “Шўртан”га қарши ўтказади.

“Андижон” – “Динамо” – 1:1 (1:1).

13 май. Андижон. “Бобур арена” стадиони. 4216 томошабин.

Ҳакамлар: Умиджон Раҳимжонов, Азиз Исаков, Ахрор Раҳматов

Захира ҳаками: Асадбек Қосимжонов

Назоратчи: Виктор Серазетдинов

Комиссар: Саид Шохруҳ

“Андижон”: Элдор Адҳамов, Ислом Маматказин, Миомир Журичкович, Абдураҳмон Комилов, Олег Зотеев, Алтин Крезиу (Искандар Шойқулов, 63), Илҳом Абдуғаниев (Дамир Темиров, 63), Фарҳод Соҳибжонов, Дониёр Абдуманнопов (Бектемир Абдуманнонов, 80), Мирзад Механович (Усмонали Исмоналиев, 80), Ислам Машуков (Рустам Турдимуродов, 46).

“Динамо”: Эдем Неманов, Акбар Абдирасулов, Майкон, Хислат Ҳалилов, Абдулаҳад Ҳошимов (Ойбек Ҳамроқулов, 33), Мақсудхўжа Аълохўжаев (Бакир Саидов, 75), Муҳаммадазиз Иброҳимов (Дилёр Бахтиёров, 46; Равшан Абдуманнонов, 80), Беҳруз Облақулов, Муҳсин Бозоров, Исмоил Фарҳодов, Воҳид Оқбўтаев.

Голлар: Дониёр Абдуманнопов, 9-пен. – 1:0. Акбар Абдирасулов, 45+2 – 1:1.

Огоҳлантиришлар: Ислом Маматказин, 89 – Исмоил Фарҳодов, 76.